- Artikelopsies
- Deel
- Kry Beeld op
Kaper, slaap maar met een oog oop
deur Herman Uys, Eldoraigne
2011-10-20 09:57
Op 17 Oktober het Beeld berig dat slegs 15% van
motorkapings- en gewapende roofsake deur die polisie opgelos word.
Nou ja, dit skep by eerste oogopslag 'n
mismoedige prentjie. Laat ons daardie
statistieke analiseer en sommer aan enige aspirant motorkaper 'n bietjie gratis
beroepsvoorligting gee.
As jy 'n
loopbaan in motorkapings wil begin, weet jy nou dat die kans dat jy na jou
eerste kaping nie vasgetrek sou word nie, 'n uitstekende 85% is.
Dieselfde geld jou tweede poging.
Onthou egter dat die gesamentlike
waarskynlikheid dat jy vir een van die eerste twee pogings NIE gevang gaan word
nie 0,85x0,85 is, dus so 72%.
As ons
daardie redenasie verder voer, is die kans dat jy binne vier pogings NIE
vasgetrek sal word nie reeds net so 50%,
en die kans om jou loopbaan voort te sit vir meer as tien pogings 'n
skamele 20%.
Self het ek nou nog nooit
'n motor gekaap nie, maar ek skat dit vat so 'n minuut om iemand met 'n pistool
uit hul kar te dwing.
Op grond van
bogenoemde is dit dus erg onwaarskynlik dat jou operasionele veldwerk in die
kapingsbedryf veel langer as 10 minute gaan hou!
Nou lyk die prentjie heelwat minder mismoedig.
'n Mens moet natuurlik die howe se
effektiwiteit byreken, en dinge is ver van waar jydit graag sou wou hê,
maar duidelik het die polisie se bydrae tog 'n effek.
Met hierdie perspektief in gedagte wil ek aan
die Beeld sê: hou asseblief aan om magsvergrype, korrupsie en mislukkings in
die polisie te rapporteer.
Die publiek moet weet waar die polisie tekortskiet.
Maar moenie alles wat die polisie vermag as netelig afmaak nie. Daar is baie getroue dienaars in die mag.
So
soek bietjie die heldedade en suksesstories en vertel ons ook asseblief
daarvan.
Aan die polisie wil ek sê: dis
'n goeie begin, maar duidelik kan dit nog baie beter. As julle daardie statistieke kan
verdriedubbel, krimp 'n kapersloopbaan na drie minute.
Hou aan, hou net
aan. Aan die publiek: dis ons motors wat
gekaap word, ons vrouens, dogters en susters wat verkrag word, ons vriende wat
vermoor word, en ons ooms en tannies wat senuagtig vir elke geluid skrik vir
maande nadat hulle in 'n pistool se loop afgekyk het.
So raak betrokke. Sluit aan by jul plaaslike Gemeenskapspolisiëringsforums, of buurtwagte, of uitreik na gevangenis, en help die
polisie om die probleem te takel.
En vir die aktiewe kaper, net dit: Hoeveel minute lank is
jy al besig? Slaap maar met een oog oop,
die SAPD kom vir jou!