- Artikelopsies
- Deel
- Kry Beeld op
Wanneer is dit net 'n "lekker storie"?
deur Simon Riekert
2011-11-02 10:51
Joernaliste dink hulle is iets spesiaals; so ’n trappie
bokant die gewone sterfling, mense met meer regte as ander burgers en dat die
media hulself as verhewe bo die reg sien.
Dís die mening van ’n klomp ANC-parlementariërs sedert
September 2011 toe die Inligtingskonsepwet vir “verdere konsultasie” onttrek
is.
Twee ANC-LP’s, Luwellyn Landers en Cecil Burgess, is die
dryfvere agter die wetsontwerp. Die reg om “geklassifiseerde” inligting te
publiseer sal deur die wet gereguleer word; inligting wat duidelik in openbare
belang is.
’n Tameletjie vir sommige wie die media om die een of ander
rede wil vermy en andersyds ’n miskenning van die demokratiese reg vir die
joernalis wie se werk dit is om inligting in berigte te omskep.
Of nie?
In die werksplek is die vrye vloei van inligting vir
werkers en hul vakbonde ononderhandelbaar, want sou dit gereguleer word, sal
beperkings alle vlakke van die samelewing raak, nie net die werksplekke nie, sê
hulle.
Wanneer is inligting (wat ’n storie kan word) in die
openbare belang? Watter skade doen dit aan die samelewing om daardie inligting
van die publiek te weerhou, en as dit uitgelek het – is dit dan nog “geheim”?
Artikel 16 van die Grondwet se Handves van Menseregte
bevat onder andere die reg op ontvangs van inligting en idees, wat natuurlik
sal insluit die vryheid van die media en die pers. So is propaganda wat kan lei
tot oorlog, aanhitsing tot geweld en haatspraak en dit wat reeds strafbaar is,
naamlik laster en die publikasie van inligting met die oog op kwaadwillige
bedoeling, reeds gereguleer.
Dit, so lyk dit vir my, maak goeie joernalistiek nie ’n
maklike taak nie en in hierdie konteks het geen joernalis meer regte as die
gewone burger nie. Daar is etiese kodes vir joernaliste wat eerlikheid en
akkurate verslagdoening van insidente en inligting in openbare belang reguleer. Objektiwiteit dus-sonder vrees of voordeel.
My vraag is, is inligting oor mnr. Fikile Mbalula se beweerde buite-egtelike verhouding in die openbare belang, of net nog ’n "juicy" storie?