As jy Jan Tuisbly se karretjie ry
2011-12-09 23:19
As jy Jan Tuisbly se karretjie ry
Vir avontuurlustiges
Beleef Gauteng soos jy seker nog nooit tevore het nie met dié opwindende buitelug-avonture.
1. Lugballonvaart
Bekyk die wêreld vanuit ’n ander oogpunt terwyl jy in ’n warmlugballon oor die Magaliesrivier-vallei vaar. Sien die sonsopkoms en geniet ’n heerlike koppie koffie of tee tydens ’n uur lange ballonvaart. Vier die landing met ’n glasie vonkelwyn en sluit die volmaakte oggend af met ’n heerlike ontbyt op die stoep van die Bill Harrop’s Original Balloon Safaris-klubhuis, wat ’n uitsig oor die Magaliesberge bied.
Wanneer: Tye beskikbaar op aanvraag.
Vir meer inligting: 0 011 705 3201 of 0 082 443 2661
2. Ry fiets deur Soweto
Lus vir iets wat jou fisiek én intellektueel sal stimuleer? Neem deel aan ’n vier uur lange fietstoer deur Soweto. Jy sal dié geskiedkundige township op ’n heel ander manier en van naby ontdek.
Besoek plekke soos oudpres. Nelson Mandela se huis en loer selfs in by ’n sjebien.
Wanneer: Elke oggend om 10:00 en middae om 13:00.
Wat kos dit? R400 per persoon
Meer inligting: 0 011 936 3444
3. ‘Kloofing’
’n Energieke avontuur wat ’n staptog deur die Magaliesberg-vallei buite Johannesburg behels. Ná die tyd kan jy van reuse-rotse in die diep waterpoele in duik. Ideaal vir diegene wat fiks, lief vir die buitelug en vertroud met hoogtes is.
Wanneer: Elke dag van die week van 09:00 tot 16:30.
Wat kos dit? R450 per persoon. Dit sluit staptoerusting, toegangsgeld en ’n toergids in.
Besprekings is noodsaaklik.
Meer inligting: 0 082 731 4696