Gesien deur bril van geloof

ons belangrikste uitdaging is die skreiende armoede op ons sub­kontinent. Die opstande in Mosambiek, die onvermoë van Zimbabwiërs om politieke verandering teweeg te bring en ons eie landwye staking bevestig hoe armoede lande van hul potensiaal beroof.

’n Mens verwag dat ons wat uit die geloofsbronne van wysheid, geskiedenis en ’n Godsbesef leef, minder selfgerig sou wees om die omvattendheid van armoede te kan insien.

Calvyn het die Bybel as ’n bril gesien.

’n Mens kyk deur die lense om God en dit wat nou van deurslaggewende belang is, te kan onderskei.

Na my oordeel fokus min gemeenskappe deur hul geloofsbril op armes om hulle moed en hoop te gee.

Kyk ons ander nie te veel na die raam in plaas van deur die lens nie?

Terwyl ons regering al hoe meer in krisisbestuur vasval, behoort geloofsgemeenskappe die omstandighede ter wille van die toekoms reg te lees. In ’n land van blindes behoort dié wat brille het, dit te gebruik – al sit dit hoe skeef.

Die sakeman Louis Fourie droom in Waar die Kerk werk (onder redaksie van Coenie Burger en andere) soos volg:
“Gestel Suid Afrika word een groot ‘skool’ waar die ‘onderwysers’ gewone mense is wat besluit het hulle gaan mensekapitaal op ’n informele sowel as georganiseerde wyse stort in hul landgenote wat agtergebly het weens die tekortkomings van ons verlede.”

Fourie se droom daag veral kerke uit: “Die tradisioneel ‘blanke’ kerke beskik oor die goue gans wat die goue eiers van mense-ontwikkeling in Suid Afrika kan lê.

“Dit behels mense met kennis – en hopelik ’n bewese gesindheid van onvoorwaardelike liefde.”

Kom ons droom hoe leerlinge uit arm gemeenskappe kerksale volsit en hoe ons meer lewensbetekenis kry. Die alternatief is te sleg om te bedink ...

Uit die Woord: “Julle is die sout vir die aarde. Maar as die sout verslaan het, hoe kry ’n mens dit weer sout?” – Matteus 5:13.