Kan die VSA veel wys vir die oorlog in Irak?

Operasie Iraqi Freedom is verby. Die laaste Amerikaanse gevegstroepe het reeds twee weke gelede na Koeweit teruggetrek. 50 000 soldate bly agter om die Irakse leër op te lei.

Dit is nadat ’n yslike prys betaal is. In geld uitgedruk het die Amerikaanse oorlogspoging $744 miljard gekos.

Maar daar is baie belangriker dinge as geld. Sowat 4 500 Amerikaanse soldate het gesneuwel en byna 32 000 is gewond.

Byna 97 500 Irakse burgerlikes het gesterf – baie van hulle weens terroristiese aanslae, maar tienduisende is deur Amerikaanse koeëls deurboor.
Wat kan aan die batekant getoon word?

Saddam Hoesein is afgesit en tereggestel. Dis beslis positief.

Die probleem is dat Irak ’n wanfunksionele land met ’n wanfunksionele regering is. En sonder die Amerikaanse troepe kan dit die land uiteindelik uiteen laat skeur tussen die Sjiïete, Soenniete en Koerde.

Onder die leiding van genl. David Petraeus is die geweld in 2007-’08 merkwaardig beteuel en het Irak ’n kans op herstel gekry. Petraeus het die vereistes van teeninsurgensie-oorlog meesterlik toegepas.

Maar daar is een ding wat hy en genl. Ray Odierno, sy opvolger, nie onder beheer het nie. Hulle kan nie ’n doeltreffende en eerlike regering soos ’n haas uit die hoed trek nie.

Irak is ’n intens korrupte land met ’n intens korrupte politieke elite. Ja, verkiesings vind plaas, maar dit gaan gepaard met die koop van stemme en grootskaalse intimidasie.

Petraeus en in ’n mindere mate ook Odierno het daarvoor gesorg dat die laaste Amerikaanse gevegstroepe, anders as in 1975 in Viëtnam, nie met die stert tussen die bene padgee nie.

Die Amerikaanse weermag het hom met ’n sekere mate van eer uit die voete gemaak.

Maar is die oorlog uiteindelik gewen?

Dis seker nog te gou om te sê, maar die uiteindelike toets sal wees wat in die volgende jaar of twee gebeur.

Ontwikkel Irak tot ’n stabiele land, kan gesê word die Amerikaners het “gewen”. Maar vir eers moet ’n mens maar skepties wees.