Motoriste se gedrag moet verander

Die jaarlikse padslagting in die Desember-vakansie het verlede jaar 1 475 mense geëis.

Die meeste van dié sterftes is volgens mnr. S’bu Ndebele, minister van vervoer, veroorsaak deur botsings reg van voor.

Ndebele het by die bekendmaking van dié syfers gesê strenger wetgewing is nodig om sulke sterftes te bekamp.

Dit sluit in ’n moontlike verbod op drink en bestuur of dat bestuurders wat pas hul rybewyse verwerf het vir ’n sekere tydperk verbied word om enigsins te drink en dan agter ’n stuurwiel in te skuif.

Die moontlikheid om die maksimum spoed van 120 km/h tot 100 km/h te verminder, word ook oorweeg.

Die vasvat van dronk bestuurders is ’n sinvolle stap.

Te veel mense gaan dood of word geskend weens onverantwoordelike mense wat onder die invloed van alkohol bestuur.

Om die snelperk te verlaag is egter onsinnig. Wat nodig is, is strenger wetstoepassing en optrede teen oortreders.

Roekelose bestuurders sal ander voertuie steeds op sperstrepe probeer verbysteek ongeag wat die snelperk is.

As daar ’n probleem is om ’n wet toegepas te kry, help dit nie jy wysig die wet nie.

Dit is ’n lui en reaktiewe optrede waardeur daar eintlik ’n verskoning gesoek word vir oortreders terwyl hulle vasgevat behoort te word.

Groter sukses kan behaal word met proaktiewe optrede, wat die opleiding van jong kinders in verantwoordelike padgebruik insluit.

Deurlopende sigbaarheid deur wetstoepassingsowerhede is ook nodig.

Die jaarlikse magsvertoon van verkeerslui in die feestyd is nie goed genoeg nie.

As motoriste se optrede dwarsdeur die jaar gemonitor word, sal dit mettertyd lei tot gedragsveranderings wat lewens kan red.

Padgebruikers se houding moet verander.

Dit is ’n moeiliker doelwit, maar meer volhoubaar as die “kitsoplossing”, die verlaging van die snelperk.