Stop ANC met sy plan vir Afrikaans

Die ANC gaan sy kop in ’n byenes steek indien hy die jongste weergawe van die wetsontwerp op tale onveranderd op Afrikaanssprekendes probeer afdwing.

Soos die wetsontwerp nou lees, kan doemprofete se profesieë oor die uitsterf van Afrikaans waar word.

Kwansuis wil die wetsontwerp veel­taligheid bevorder, maar die Orwel­liaanse uitwerking daarvan gaan wees dat Engels die lingua franca en enigste ampstaal gaan wees.

Engels en Afrikaans word in die wetsontwerp uitgesonder as twee voorheen bevoordeelde tale, waarvan net een in ’n streek as ampstaal gekies mag word.

In praktyk is dit die einde van Afrikaans as ’n ampstaal.

Om Afrikaans en Engels oor dieselfde kam te skeer is óf kwaadwillige skoorsoekery van die ANC teenoor Afrikaans óf skokkende onkunde.

Engels is ’n koloniale taal wat in die globaliserende wêreld sterk tale soos Duits en Frans ongemaklik laat voel.

Afrikaans is ’n inheemse taal soos Zoeloe en Xhosa.

Weliswaar is Afrikaans onder die NP-bewind bevorder, maar die taal het ’n lang geskiedenis voor die NP gehad.

Afrikaans hoef nie die een of ander skuld vir apartheid betaal nie. Die taal het nie apartheid begin nie, net soos Duits niks met Nazi’s te doen gehad het nie.

Afrikaners, Afrikaanssprekendes of wie ook al watter variant van Afrikaans praat, moet woedend wees omdat die ANC Afrikaans nie as inheems beskou nie.

Dis ’n belediging vir al die sprekers van die taal, van wie die meeste nie wit is nie.

Afrikaans is een van die min inheemse Afrika-tale wat tot ’n kuns- en wetenskapstaal ontwikkel het waarin werke van wêreldgehalte geskryf word.

Afrikaans is genoeg afgeskaal. Die streep in die grond moet hier en nou getrek word.

Die ANC kan Afrikaans liewer as model vir die ander inheemse tale gebruik. - Beeld-hoofartikel 6/2/2012