Klein dorpie, groot sjarme
2010-01-30 06:00
- Artikelopsies
- Deel
- Kry Beeld op
Hoekom is julle mal daaroor om in Riebeek-Kasteel te bly?
Dis ’n klein plekkie, maar dit bied ’n diverse gemeenskap van gerespekteerde kunstenaars en professionele mense wat ontsnap van die besige stad. Ons het als tot ons beskikking hier – van vars plaasprodukte tot kwaliteit-meubels. Hier is selfs ’n Franse vrou wat onlangs ’n koffiewinkel oopgemaak het – en sy bedien die beste Belgiese sjokoladeroomys!
Wat maak die dorp spesiaal?
Dit is ’n klein gemeenskap wat omgee. Ons is afgesonder van die besige leefstyl wat ons deur die week handhaaf, maar tog is ons steeds net ’n uur weg van Kaapstad, Stellenbosch en die Paarl.
Watter restaurant is bo-aan jul uiteetlys en hoekom?
Daar is ’n paar! Auntie Pasti vir sy fantastiese Italiaanse mezzeproe-spyskaart, Bar Bar Black Sheep vir sy tradisionele boere-ontbyte en vir ’n romantiese aand is die sjiek Café Felix perfek.
Waar is ’n lekker kuierplek?
Auntie Pasti het op naweekaande dikwels ’n DJ wat gesellig is.
Lattitude is ook gewild onder besoekers en inwoners.
Watter drie plekke moet toeriste sien op ’n besoek aan Riebeek-Kasteel?
’n Besoek aan die Kloovenburg- wyn-en-olyflandgoed asook die naburige Olive Boutique is ’n moet. Snuffel deur die winkels in en om Shortstraat en laastens sit op die stoep by die Royal-hotel vir ’n oggend-koffie of ’n laatmiddag drankie.
Watter mark of winkel is jul gunsteling?
Ons loer graag in by Garden Bleu – ’n kwaliteit-tuintoebehore-winkel. Ancient Spirits, wat spe-siale binnenshuise dekor-items bied, is ook ’n gunsteling. Ons besoek altyd die maandelikse varsproduktemark in Short-straat vir die beste “babelas-burgers”, soutterte en kolwyntjies.
Waar is die pragtigste plek in Riebeek-Kasteel?
Die uitkykpunt op die heuwel net voordat mens afry in die vallei.
Spog met jou dorp!
As jy dink jou dorp is die beste plek onder die son, skryf vir ons en vertel hoekom jy so dink!
Stuur e-pos na naweek@ media24.com met volledige besonderhede van jou dorp en ’n paar foto’s.