Wie erf dan jou gat as jy hom gekoop het?

Dis vir my ’n pragtige storie van die dorpie in Duitsland (en die ouens in Kempton-on-Tambo) wat ontslae wil raak van hul slaggate deur hulle te verkoop.

Wat ’n rein gedagte!

Lyk my jy gaan sien jou gat, neem dan jou gat aan deur hom te koop en met daai geld maak hulle dan jou gat vir jou reg.
 
En dan sit jy ’n koperplaatjie op jou gat en dan kan jy hom gaan sien soveel keer as wat jy wil, en selfs met hom gesels as jy die soort ou is wat graag met jou gat gesels.

En ou Essie het in sy spotprent hierdie week sommer geteken hoe hulle met ’n gatsometer jou gat se grootte en prys vir jou gaan vasstel. Als klaar uitgewerk!

“Maar wie dink julle ouens sal so dom wees om hom ’n gat in die kop te laat praat en dan ’n gat in ’n pad te koop?

“En wat maak jy met die ding? Want jy kan hom nie eens vir ’n graf gebruik nie, want netnou ry ’n kar jou dood,” vra Neef Bartel.

“Nee, man, dis glad nie so ’n vrot idee nie,” reken Oom Johnny. “Dink net só daaraan: Dis een van die min goed waarin jy in ons land kan belê waar jy doodseker kan wees dat jou belegging oor die volgende paar jaar tienvoudig gaan groei.”

“Maar wat gebeur met jou gat as jy doodgaan?” wil Dik Daan weet.

“Hoe sal dit klink as die prokureur die oom se testament lees en daar staan: ‘Aan my dierbare Gertruidatjie, wat my so mooi tot in my oudag versorg het, laat ek in liefde my gat na.’

“Miskien moet ’n ou maar eerder as jy doodgaan jou gat vir die Tshwane-gatsraad teruggee, of hoe dink julle?”

Ek lees die afgelope week dat die Geneefse sakeskool in ’n studie onder 1 000 getroude pare bevind het dat deur ’n eenvoudige formule te volg die kans op ’n suksesvolle huwelik met 20% styg.

(Interessant waarmee sakeskole hul dae kan verwyl ,nè?)

Die formule is blykbaar heel eenvoudig: Trou met iemand uit jou eie sosiale omgewing (Dik Daan sê hy hoop nie dit beteken hy moes eerder met ’n Blou Bul-aanhangertjie getrou het nie!) wat vyf jaar jonger as jyself is en wat 27% slimmer as jyself is (ook nie te moeilik nie).

En moenie láter eers die jonger vrou gaan soek nie; dit tel nie!

Onthou die ou storietjie van die tweetjies wat albei 62 was en toe op hul 40ste huweliksherdenking ’n besoek van die wensfeetjie kry. Elkeen kan iets wens.

Vroutjie wens vir ’n trippie om die aarde op die Queen Elizabeth, en net daar staan sy met twee retoerkaartjies in die hand.

Hý loer vir vroutjie, toe vir die feetjie en besluit toe wat de hel: “Ek soek ’n vrou wat 30 jaar jonger as ek is,” blaker hy uit.

“Geen probleem nie!” roep Feetjie uit en die volgende oomblik is die oukêrel 92.

So, my ou maat, pasop waarvoor jy wens en onthou, feetjies is ook vroumense!

Kortbroek dalk die nuwe klimaatshoof van die Vermenigde Nasies?

Ja-nee, ons man ken van die klimaat en seile na die wind!

En van seile gepraat: Saterdag skree julle Bulle weer almal vir die Cheetahs teen die Stormers nè?!