Gertanus, ontmoet vir Ambey!

Jou moeder en vader het besluit jy moet eenvoudig familiename kry. Die oupa en ouma is so genoem, en jy sal ook!

Dit was nie onder bespreking nie en daarom spel jy vandag elke dag vir ’n telesales girl, stadig en beheers:“G-e-r-t-r-u-i-d-a, J-o-h-a-n-n-a, J-a-c-o-b-a, W-i-l-h-e-l-m-i-n-a” met saamgeperste lippies en opgeslane oë ten einde jou SAL Voyager-kredietkaart te kan bekom.

Hierdie ellendige spel – letterlik – van 30 minute word ná ’n paar dae herhaal wanneer die telesales girl se bestuurder jou bel, net om gou ’n paar goedjies met jou te bevestig ...

Dit is hierdie 60 minute se spelling van name wat jou bloeddruk van ’n gesonde 120 oor 70 kan verander in 180 oor ek-dink-nie-ek-wil-meer-die-SAL-Voyager-kredietkaart-en-al-die-bonuspunte-hê-nie!

Dit ontstel my dat die telesales-brigade deesdae blykbaar ook nie meer kan spel nie en ewe skielik ook nie Afrikaanse name kan uitspreek of herken nie.

Ek weet van ’n hele klompie mense wat die afgelope tyd besluit het om tog familiename vir die bloedjies te gee wat nou gebore word.

Die Johannesse, Stephanusse, Jacobas en Katarinas moet êrens voortleef, al is dit maar net om die ewige guns van die skoonfamilie te probeer wen of die familieplaas te kan erf!

Of dalk help dit as die bloedjie eendag wil aansoek doen om jou grond in die Wes-Kaap terug te kry?

Saam met die De la Rey-liedjie het die Afrikanervolk besluit om deesdae haaks vas te steek en die familiename te gebruik as ’n soort stille protes teen die huidige politieke klimaat in die land.

Die tendens is mos ook om ’n bietjie van die man se naam en bietjie van die vrou se naam te gebruik vir hierdie nuwe kunswerkie of, sal ’n mens maar sê ... “neologisme”. Wat die HAT nie kan skep nie, kán die nuwe generasie van “estate”-bewoners.

Die neologismes word dan in kleur en geur herhaal vir kuiergaste terwyl die neologismetjie nog veilig sit en broei in die “estate”-mammie.

So het Gertruida en Stephanus ook besluit op ’n neologismetjie vir hul klein pienkvoet.

Wel, helfte van Gertruida is “Gert” en helfte van Stephanus maak uiteindelik, wel – Gertanus?

Stephanus het blykbaar dadelik kapsie teen die naam gemaak, maar Gertruida het gedink hulle moet dit maar net vinniger probeer uitspreek:Gert-anus! Gert-anus! Gert-anus!

Maar dit willie werk nie en die woord val net nie so lekker op die tong nie.

Amanda en Beyers was net so opgewonde om ’n nuutskeppinkie te kon uitdink. En Amanda was mal oor iets wat Frans kon klink. Iets vloeiends sou vir haar kon werk – ietsie wat in ’n oop lettergreep eindig.

Die resultaat, Am vir “Amanda” en Bey vir “Beyers” maak, wel – Ambey? Ek vermoed hulle het toe weldra besef dat daar geen Franse geurtjie in daai naampie gevind gaan word nie.

Arme Johan en Yolandi het ook nie voorsien die samesmelting van hul name sal uitloop op Joh-yol nie, en arme ou Malindi en Fanie se baba word Malfa – en niemand wil hul kind na ’n poeding noem nie.

Ronel en De Waal word Rondawel ... mmm?

’n Mens kan jouself mos al in die ronde dink aan al dié soort van goeters!

Die volk gaan nog lank sukkel met name. Daar gaan nog baie slapelose nagte vir die “estate”-bewoners wees en Fanus en Magriet gaan nog lank skrik vir hul eie neologismetjie.

En agterna saam in die bad sit en tjank oor hul klein “Riet-anussie” wat verkeerd opgeneem gaan word deur die mense daar buite.

Susan Hattingh is ’n Beeld-leser en woon in Irene, Pretoria.

- Beeld