Lood se praatjies
2010-02-18 10:26
- Artikelopsies
- Deel
- Kry Beeld op
En daar slaap die hele land toe verlede week saam met die president!
Hoe kon dit ook anders, want daai was waaragtig die verveligste toespraak sedert Oupa Gqozo destyds president van Ciskei geword het.
Nou verstaan ons ook waarom die president sy toespraak in die aand gehou het; dit onderbreek nie ’n mens se roetine so erg soos ’n oggendslapie nie.
Die presidensie dink vir ’n ander rede dit was ’n goeie skuif om die parlement vanjaar vir die eerste keer in die aand te open:
Meer as dubbel die aantal mense het glo ons hoofman se toespraak op TV gevolg vergeleke met verlede jaar se staatsrede deur die bykans vergete Kgalema Motlanthe.
Wat die presidensie gerieflikheidshalwe uit die oog verloor het, is dat sy toespraak uitgesaai is terwyl miljoene mense verbaas gesit en wonder het wat van 7de Laan geword het.
Lood se wenk vir selfs ’n groter gehoor volgende jaar: Kry die staatspresidentswag se orkes om die Laan se kenwysie te speel wanneer die president begin praat.
DA se swart klone
Nie almal dink natuurlik die vader van die nasie se toespraak was slaapwekkend nie. So sê die Kommunistiese Party in ’n verklaring:
“It is sad that the opposition has missed the point and sought to represent themselves as pressure groups whose sole intention is to appropriate the priorities as outlined in the state of the nation address for their narrow class interests. The clever disguise in thename of meritocracy, efficiency and capacity of the class interests of the propertied class must be continuously exposed.”
Ja-nee, oppas vir die gevare van meriete en doeltreffendheid!
Die SASKP het ook ’n rooi eiertjie gelê oor die uitstappery vandeesweek deur parlementslede:
“The walkout yesterday by the DA and its black clone in the form of Cope represents how these mavericks have no interest in any open public debate whatsoever but grandstanding.”
Dis geen wonder selfs DA-lede begin al vloek in die parlement nie.
Ons betaal, so gaan maak reg die paaie!
’n Oulike foto-grappie is in omloop. Dit wys iemand se motorlisensieskyfie met ’n boodskap daarby aan ’n verkeersbeampte wat dit dalk sou inspekteer: “Ja, ek het my lisensie betaal. Gaan maak nou die f***** gate in die pad reg.”
In Lood se beskeie mening is dit ’n veel beter opsomming van die stand van die land as daardie narkofiliese oefening wat voorgehou is as die president se openingsrede.
SuperMulder kom tot die redding!
Die VF+ is steeds besig om alle krediet vir die behoud van Pretoria se naam op te eis – nogal vreemd dat AfriForum dít maar so gelate aanvaar.
Sê die Plussers: “Pretoria (kon) tans amptelik Tshwane gewees het indien die party se leier, dr. Pieter Mulder, nie in ’n posisie was om senior ANC-leiers, insluitend pres. Jacob Zuma, te oortuig om eerder die pad van gesprek en wedersydse respek ... te volg nie.”
Ja well no fine, soos hulle sê, maar Lood vermoed steeds die ware rede dat Pretoria nie Tshwane is nie, het meer te doen met die regering se vrees vir ’n verleentheid tydens die Wêreldbeker-sokkertoernooi.
Sal ons oor ’n jaar steeds die goeie doktor kan bedank dat Pretoria nog Pretoria heet?
lood@beeld.com