Danksy die Grondwet...

Wat sou dit wees wat die jag op die Grondwet skielik oop verklaar het?

Dalk was dit omdat die land twee weke gelede stilgestaan het om te reflekteer oor FW de Klerk en Nelson Mandela. Maar toe na die hede gekyk het, pleks van die verlede en ’n land gesien het wat koersloos dobber. Toe kry die Grondwet sommer die skuld.

Links van die ANC, in die PAC, Azapo, daai lot, word die Grondwet uitgekryt as ’n onheilige stuk uitverkopery tussen die ANC en die ou NP. Dit beskerm wit mense hopeloos te veel, sê húlle.

“Uitverkoop” is ook die woord waarmee die heel ander kant van die spektrum die 1994-skikking beskryf. Wat ’n mens laat wonder: Albei kan tog nie reg wees nie?

Kritiek teen die Grondwet waaraan ek my nog nooit gesteur het nie, is dié van mense wat destyds die onderhandelinge geboikot het. Slim agterna wys niemand niks.

Hier’s die ou vraag weer: As die ANC-regering nie die politieke wil het om die gees van die huidige Grondwet te eerbiedig nie, watter kans is daar dat hy sou hou by ’n grondwet wat sy mag nóg meer aan bande lê en minderheidsregte nóg sterker verskans? Antwoord: Nul.

Al beskou die ANC 1996 se Grondwet as sy eie, was hy nog altyd skoorvoetend oor die artikels wat onverdunde meerderheidsmag inperk. Hulle sou dus ’n beperkender grondwet nóg minder in stand gehou het as wat tans gebeur.

Oudmin. Pik Botha sê eerder as die legalistiese benadering van die NP-onderhandelaars wat destyds alles in ’n grondwet wou inskryf, moes hulle liewer gegaan het vir ’n omvattende, historiese “grand deal” tussen die Afrikaners en Mandela.

Ek twyfel.

Jacob Zuma se ANC sou géén ooreenkoms eerbiedig het nie. Hulle is politieke sakkerollers vir wie niks heilig is nie.

Hier’s hoekom die Grondwet se arms omhoog gehou moet word: Dit is die raamwerk van en die bolwerk vir die oop samelewing wat ons het.

Ons aanvaar dit hopeloos te vanselfsprekend dat Suid-Afrika nie vandag ’n geslote gemeenskap is soos Zimbabwe of Saoedi-Arabië nie. Danksy die Grondwet en die oop samelewing wat hy daarstel, kan Solidariteit 23 000 briewe teen misdaad mobiliseer. (Het die presidensie nie sy naam behoorlik gat gemaak met dié een nie?)

As Suid-Afrika ’n geslote gemeenskap was, sou dit hoogverraad gewees het om die president te kritiseer. Daardie bloulig-boelies in die Zuma-konvooi wat die outjie in die Kaap so gemoerak het? Dit sou ’n alledaagse verskynsel gewees het.

Nou is die mense woedend.

Zuma se boelies kan egter niks aan Chumani Maxwele doen nie, want die Grondwet beskerm hom. Geen wet is oortree nie.

Net in ’n oop samelewing kan daar ’n bohaai wees omdat die president se vriend, die korrupte bedrieër Schabir Shaik, ’n bedenklike mediese parool kry én dit misbruik.

In Zimbabwe sou Shaik nie eens aangekla gewees het nie.

Sonder art. 16 van die Grondwet wat spraakvryheid verskans, sou ons nou nog nie geweet het van Zuma se amoreuse avonture nie.

Sou Zapiro en die ander ook nie daardie spotprente kon teken wat so liederlik met Zuma en die ANC die draak steek nie. Zapiro sou in die tronk gesit het.

Omdat ons ’n oop samelewing is, vertel Beeld se lesers ons van die verskriklike misdaad wat hulle tref.

Ons berig daaroor en só word die owerhede se doelwit om slegte misdaadnuus stil te hou of te onderspeel, verydel.

Ek dink die ANC verfoei art.?16. Want dis wat hulle sal keer om ’n “mediatribunaal” in te stel om die vrye media te snoer.

Die Grondwet is ’n feilbare, menslike dokument. Hy is net so goed as wat die maghebbers bereid is om hom in stand te hou.

Ons moet hulle daartoe dwing – op elke denkbare manier. Dis waarheen die energie moet gaan, nie na ’n steriele verwensery
van die verlede nie.

- Beeld