Hoe lank nog vir Zuma?

'n Swart redakteur wat baie weet van die ANC se geskiedenis en kultuur het eendag gesê al die ANC se hoofleiers het aan drie vereistes voldoen: Hulle was mense van integriteit, hulle was besonder intelligent en hulle het uit ’n familie gekom wat gereken is in die plaaslike gemeenskap.

So was dit met al die ANC-leiers van die onlangse tyd: Albert Luthuli, Oliver Tambo, Nelson Mandela en Thabo Mbeki.

Toe ek en my vriend dié gesprek gehad het, was Mbeki nog president van die ANC en die land. Ons het gesit en wonder wie hom sou opvolg. Zuma voldoen nie aan dié drie vereistes nie en dit gaan hom pootjie op pad Uniegebou toe, het hy gesê.

Ek dink Zuma kom een van die voorwaardes na: Hy is slim. Soos in uitgeslape, eerder as skrander. Of “slu”, soos die Britse koerant The Guardian hom vandeesweek genoem het. ’n Mens maak maklik die fout om te dink omdat Zuma nie boek­geleerd is nie en nie goed kan lees nie, hy dom is.
Hy is nie.
As hy dom was, sou hy nie die hiperintelligente Thabo Mbeki so omvattend uitoorlê het soos wat in Polokwane gebeur het nie.

Wat die sosiale stand van Zuma se familie betref: Mense word deesdae nie meer op grond daarvan geoordeel nie. Tog is dit soms belangrik om te weet van watter hout iemand gesny is.

Dis seker disrespekvol om te sê Zuma het geen integriteit nie. Bes moontlik is hy ’n goeie man.
Maar kom ek sê dit: Iemand van integriteit sou nie sake van enige aard gedoen het met Schabir Shaik nie, selfs al was hulle saam in die bevrydingstryd.
Oudpres. Nelson Mandela het Zuma gewaarsku om nie met die Shaiks deurmekaar te raak nie.
Zuma het nie ag geslaan daarop nie.

Iemand met integriteit sou nie gehuiwer het om hof toe te gaan om sy onskuld te bewys as hy werklik in sy onskuld geglo het nie.

Pleks daarvan is soveel politieke druk uitgeoefen dat die vervolgingsgesag inligting wat op ’n ongerymde wyse bekom is as verskoning gebruik het om die vervolging teen Zuma te staak.

Dit sou iemand met integriteit gegrief het dat Shaik ’n hoogs verdagte mediese parool kry terwyl almal weet Shaik is heeltemal gesond genoeg om in die tronk te wees.

Iemand met integriteit sou nie Julius Malema se bombasme en openbare ploertigheid verduur het nie. So ’n mens sou ook nie die
Mafia-agtige wyse verdedig waarop Malema hom verryk deur tenderpreneurskap nie.

’n Leier van integriteit sou tewens nooit eens toegelaat het dat Malema die politieke monster word wat hy vandag is nie.
Net ’n president met ’n integriteitsprobleem sou ’n gediskrediteerde amptenaar soos Menzi Simelane aangestel het in die kritiek belangrike pos van vervolgingshoof.

Dis so helder soos daglig Simelane is nie daar op verdienste nie; hy is bloot daar om seker te maak Zuma kry nie verdere regsprobleme nie.

Zuma se magsbasis is aan die wankel. Mnr. Zwelinzima Vavi van Cosatu maak geen geheim daarvan nie dat hy ontnugter is deur Zuma. Die held van Polokwane kon toe uiteindelik weinig lewer vir die linkses en hul utopiese drome.

Malema is nog op die Zuma-wa, maar hy is erg verwond, miskien self noodlottig. Die onthullings oor sy bedenklike saketransaksies kom van binne die ANC, nie van die DA, die “wit”-beheerde media of die “magte van duisternis” nie.

Zuma voer die gesag oor ’n wanfunksionele party, verlam deur ’n rits faksies. Nie een van daardie faksies sal iets ontsien om sy sin te kry nie.
Drie weke gelede het Zuma die ANC skaam gemaak met sy patetiese openingsrede in die parlement.
In Londen het dit vandeesweek nie veel beter gegaan nie.
G’n wonder daar word gesê Zuma sal nie die jaar uitsien nie.