Ali se legendariese afrigter dood

TAMPA. - Angelo Dundee, die briljante motiveerder van boks-grotes soos Muhammad Ali en Sugar Ray Leonard, is Woensdag hier in die ouderdom van 90 jaar dood.

Dundee was veral daarvoor bekend dat hy byna regdeur Ali se loopbaan in dié swaargewig-legende se hoek was.

Maar die boksgemeenskap het Dundee ook geken as 'n ambassadeur vir die sport en 'n man met integriteit in 'n sportsoort wat dikwels 'n gebrek daaraan gehad het.

Sy seun, Jimmy, sê Dundee se familie was langs sy pa se sterfbed.

Dundee kon darem Ali se 70ste verjaardagpartytjie verlede maand in Louisville, Kentucky bywoon.

"Dit is soos hy wou sterf," het Jimmy Dundee gesê. "Hy het alles gedoen wat hy wou."

Hy het gesê sy pa is verlede week weens 'n bloedklont in die hospitaal opgeneem. Hy was daarna vir 'n kort rukkie in 'n rehabilitasiesentrum voordat hy na sy woonstel teruggekeer het.

"Hy het goed herstel, maar gister het hy asemhalingsprobleme ondervind. Ons het ons almal daarheen gehaas. Al die kleinkinders was daar. Hy wou nie stadig sterf nie," het sy seun gesê.

"Hy was die hele pakket," het die promotor Bob Arum gesê.

"Angelo was die grootste motiveerder van alle tye. Maak nie saak hoe sleg dit gegaan het nie, Angelo het dinge altyd in 'n positiewe lig gestel. Dít is waarvan Ali veral gehou het."

Arum sê dit was Dundee wat Ali oorreed het om vas te byt in sy derde geveg teen Joe Frazier in die sogenaamde Thrilla in Manilla.

Sonder Dundee, het Arum gesê, sou Ali dalk nie die krag gehad het om Frazier te klop nie.

Dundee was ook in Leonard se hoek in sy geveg in 1981 teen Tommy Hearns. Toe Leonard noustrop getrek het, het Dundee aan hom geskree: "Jy smyt dit weg, ou seun. Jy smyt dit weg."

Leonard het eindelik met 'n uitklophou gewen. - Sapa-AP