Cheyne laat sy studies staan vir Spele

PRETORIA. – Cheyne Rahme is so ernstig oor sy deelname aan die Olimpiese Spele in Londen dat hy sy handboeke vir ’n jaar gaan wegpak sodat hy net op paalspring kan fokus.

Hy het ook in November die stof van Johannesburg van sy voete geskud sodat hy in Stellenbosch onder Joep Loots kan oefen.

Dit was Loots wat Okkert Brits destyds gehelp het om op ’n hoogte van 6 m te slaag.

Rahme het twee jaar gelede in Germiston op 5.50 oor die dwarslat geseil.

Dié vertoning het beteken dat hy nie net sy eie SA ju­nior rekord (5.47) verbeter het nie, maar ook die vyfde Suid-Afrikaner geword het wat 5.50 spring.

Brits (6.03 – 1995), Riaan Botha (5.91 – 1997), Fanie Jacobs (5.60 – 2003) en Pieter Brits (5.50 – 1997) is die ander vier lede van dié uitgelese klub.

Verlede jaar het Rahme ’n sukkel-seisoen beleef. Sy beste hoogte was maar ’n beskeie 5.43.

Dit was volgens Rahme die wekroep wat hy nodig gehad het.

“Ek het besef ek sal iets drasties moet doen as ek wil verbeter. Dis goed en wel om 5.50 te spring, maar in internasionale atletiek beteken dit absoluut niks nie.”

Verlede jaar het altesame 22 paalspringers hoër as die Olimpiese kwalifiserende A-vereiste van 5.72 gespring.

“Vir my is dit ononderhandelbaar. Ek moet doodeenvoudig dié seisoen 5.72 spring. As ek dit nie regkry nie, sal ek ’n groot besluit oor my atletiektoekoms moet neem,” het Rahme gesê.

“Ek is versigtig optimisties dat ek dit wel sal regkry. Ek het vir die eerste keer ’n goeie winterseisoen agter die rug en is beslis sterker en fikser as voorheen.”.

Volgens Rahme is daar ’n kans dat hy volgende maand aan die Europese binnenshuise seisoen kan deelneem.

“Dit sal goeie voorbereiding vir die Spele (in Julie en Augustus) wees.”

Die plan is dat Rahme gisteraand in Stellenbosch aan ’n klein byeenkoms sou deelneem sodat hy ’n hoogte aan die organiseerders van Europese byeenkomste kan stuur.