Contador geskors, titel kwyt
2012-02-06 13:53
- Artikelopsies
- Deel
- Kry Beeld op
Die arbitrasiehof vir sport het die fietsryer Alberto Contador vir twee jaar geskors en hom volgens die Spaanse Fietsryfederasie gestroop van die Tour de France-titel wat hy in 2010 gewen het.
Sy skorsing is terugwerkend van krag en hy kan weer op 6 Augustus aan wedrenne begin deelneem.
Dié driemalige wenner van die Tour de France het positief getoets vir die verbode middel clenbuterol op die tweede rusdag van 2010 se Tour.
Hy het aangevoer dat dit die gevolg was van besmette vleis wat hy geëet het en 'n Spaanse fietsrytribunaal het dié jaer onskuldig bevind.
Dit het Contador in staat gestel om die afgelope sowat twee jaar steeds aan fietsrenne deel te neem.
Die Wêreldagentskap teen Dwelmmisbruik (Wada) en die Internasionale
Fietsryfederasie (UCI) het teen dié beslissing geappelleer en Maandag
het die arbitrasiehof vir sport in hul guns beslis.
Andy Schleck van Luxemburg, wat tweede was in 2010 se Tour, sal na verwagting as die wenner aangewys word.
Al Contador se uitslae die afgelope twee jaar, insluitend sy sege in verlede jaar se Giro D'Italia, kan nietig verklaar word. - ESPN; BBC; Sapa