Dubbele slag vir Contador
2012-02-06 22:05
PRETORIA. – Alberto Contador, ’n driemalige Tour de France-wenner, het gister maar die derde fietsryer in die Tour se 109-jarige bestaan geword wie se titel van hom weggeneem is.
Dit volg nadat die arbitrasiehof vir sport beslis het dat die Spanjaard wel gedurende die Tour in 2010 clenbuterol, ’n verbode middel, gebruik het.
Contador het aangevoer dat hy dié middel sou ingekry het nadat hy besmette vleis geëet het.
Die arbitrasiehof het bevind dat die verskoning onwaarskynlik is en daarom is hy vir twee jaar geskors. Die vonnis is terugwerkend, wat beteken dat Contador weer van 6 Augustus aan renne kan deelneem.
Andy Schleck van Luxemburg, wat in 2010 tweede net 39 sekondes agter Contador geëindig het, word nou as die Tour-wenner beskou. Schleck het al verlede jaar gesê dit is nie hoe hy ’n Tour wil wen nie.
In 2006 is Floyd Landis se Tour-titel van hom weggeneem nadat daar in ’n toets bevind is dat sy testosteroon-vlakke heeltemal te hoog was.
Maurice Garin van Frankryk, wat in 1903 die eerste Tour de France gewen het, het in 1904 die eerste kampioen geword wat amptelik vir twee jaar geskors is. Sy titel is ook weggeneem.
Dié presiese rede hiervoor is nie duidelik nie. Gerugte wil dit hê dat Garin op sy oudag erken het dat hy ’n deel van die Tour in ’n trein sou afgelê het.
Contador is die vierde Tour-kampioen sedert 1996 wat hom aan die gebruik van verbode middels skuldig gemaak het.
Bjarne Riis, 1996 se kampioen, het in 2007 erken hy het verbode middels gebruik toe hy gewen het.
Jan Ullrich, kampioen in 1997, is in 2006 nie toegelaat om aan die Tour deel te neem nie, omdat daar bewerings was dat hy verbode middels sou gebruik het. Hy het in 2007 uitgetree voordat die ondersoek afgehandel kon word.
Marco Pantani, 1998-kampioen, het wel nooit positief getoets nie, maar hy is in 1999 nie toegelaat om die Giro d’Italia te voltooi nie, omdat sy rooibloed-telling die wenkbroue laat lig het.
Die vermoede het bestaan dat hy EPO sou misbruik het.
Pantani het in 2004 aan ’n oordosis kokaïne gesterf.
Ten spyte daarvan dat die VSA se federale ondersoek laat vaar is ná die beweringe dat Lance Armstrong, sewemalige kampioen,verbode middels sou gebruik het, sal daar altyd ’n vraagteken oor dié Amerikaner hang.
Cyclingnews.com haal ’n joernalis van Sports Illustrated aan wat sê hy is nie verbaas dat die ondersoek teen Armstrong laat vaar is nie.
“Armstrong is ’n magtige man met baie kontakte in hoë plekke. Hy is ook dié held van baie mense.”
Die vrae wat altyd oor Armstrong gevra word, beteken dat Carlos Sastre (2008) en Cadel Evans (2011) waarskynlik die enigste twee werklik “skoon” Tour-kampioene van die afgelope 16 jaar is.