Medalje vir Mokoena in Split?

PRETORIA

Dit sal interessant wees om te sien of Khotso Mokoena, wanneer hy vanmiddag aan die Wêreldbeker-byeenkoms in Split, Kroasië, deelneem uiteindelik daarin geslaag het om sy beserings af te skud.

Mokoena was vanjaar nog net op sewe plaaslike en internasionale atletiekbyeenkomste in aksie.

Desondanks bly Mokoena bewys hy is een vir die groot oomblik.

Elke keer wanneer dit saak maak, wen hy ’n medalje.

Op die binnenshuise Wêreldbyeenkoms in Doha, Katar, was hy tweede met ’n sprong van 8.08 m.

Hy het die Suid-Afrikaanse titel met ’n sprong van 8.01 m gewen en het seker gemaak hy is die Afrika-kampioen toe hy 8.23 m gespring het.

Daarom dit sal geen verrassing wees as Mokoena wel vanmiddag ’n medalje wen nie.

Wat kommer wek, is die afstande wat Mokoena vanjaar spring.

Hy kon nog net twee keer verder as 8.20 m spring. Eintlik uit ’n statistieke-oogpunt gesien, net een keer. Die 8.22 m wat hy in Durban gespring het, was met ’n sterk wind van agter.

Dit steek maar sleg af teen sy vertonings verlede jaar toe hy die Afrika- en Suid-Afrikaanse rekord met ’n sprong van 8.50 m verbeter het.

Boonop het hy toe ook ’n slag 8.47 m gespring, drie keer 8.33 m, twee keer 8.29 m, 8.28 m en 8.27 m.

Mokoena het ook ’n silwermedalje op die Wêreldbyeenkoms in Berlyn gewen, wat beteken 2009 was uit ’n verspring-oogpunt ongetwyfeld sy beste jaar tot nog toe.

Daar kan tereg gewonder word of die agent Juka Harkonen dalk gefouteer het deur toe te laat dat Elna de Beer Mokoena nie meer afrig nie.

Sy is die een afrigter wat weet hoe om die beste in Mokoena na vore te bring. Dit was opmerklik dat toe De Beer hom verlede jaar afgerig het, hy byna nooit beseer was nie.

Die vraag wat beantwoord moet word, is of ’n agent betrokke moet raak by die afrigting van sy atlete?

Die ander Suid-Afrikaners wat in aksie is, is: LJ van Zyl (400-hekkies), Burger Lambrechts (gewigstoot), Chris Harmse (hamergooi), SA 4x100-mansaflosspan, Elizna Naudé (diskus) en Sunette Viljoen (spiesgooi).