Boucher slaggereed
2010-09-07 22:12
PORT ELIZABETH
Suid-Afrika se wêreldrekordhouer-paaltjiewagter, Mark Boucher, is reg om in die Kampioeneliga-toernooi die handskoene aan te trek.
Boucher het pas van ’n lastige rugbesering herstel.
Hy was gister op St. Georgepark vir die Warriors in aksie in ’n twintig20-oefenwedstryd teen die Oostelike Provinsie.
Dit is ter voorbereiding vir dié blitsreeks, wat Vrydag in Johannesburg begin.
“Ek het gister (eergister) vir ’n opvolgskandering gegaan. ’n Spesialis het gesê ek kan weer speel en hopelik is daar nie probleme met die rug in die toernooi nie,” het Boucher gesê.
“Dit was dieselfde besering wat in Indië opgedoen is (toe Suid-Afrika vroeër vanjaar daar getoer het) en toe later in die Wes-Indiese Eilande weer opgevlam het.
“Voor die onlangse oefenkamp in George het ek weer las daarvan gehad.”
Dié 33-jarige Oos-Kapenaar het reeds 944 slagoffers in al drie weergawes van die spel op sy kerfstok – meer as enige ander paaltjiewagter tot nog toe.
“Die ruskans het gehelp, maar die paar dae voor die toernooi begin, sal ek sommer baie balle slaan om weer op dreef te kom,” het Boucher gesê.
Die Warriors begin hul aanslag Saterdag, wanneer hulle Sri Lanka se provinsiale kampioenspan, die Wayamba Elevens, in die Baai pak.
Boucher het erken die tuisspan “weet nie veel van die Elevens nie”.
“Ons sal nog heelwat beeldmateriaal van hulle bestudeer, maar ons is nie te bekommerd oor enige van ons teenstanders nie en fokus eerder op ons eie spel en intensiteit.”
Die Warriors is vandag wéér met die OP slaags nadat dié span verras het deur Suid-Afrika se Pro20-wenner met 29 lopies te klop.
Danksy Kelly Smuts (69, 50 balle, 5x4, 3x6) kon die OP 135/8 aanteken, waarna hy die Warriors tot net 106/9 beperk het.
Makhaya Ntini (3/16) en Lonwabo Tsotsobe (3/25) was die verloorspan se beste boulers, terwyl die linksdraaier Jon-Jon Smuts 4/23 vir die OP ingeoes het.
Terwyl die Australiese sneltrein Shaun Tait reeds sy lippe aflek om op die kolwers in vanjaar se toernooi losgelaat te word, sal die Royal Challengers Bangalore swaar steun op sy Suid-Afrikaanse invloed, berig Eduan Roos.
Tait is een van die South Australian Redbacks se troefkaarte en het onlangs ’n aflewering van 161.1 km/u afgestuur – op een na die vinnigste in die geskiedenis.
“Ek het nog nooit voorheen in Suid-Afrika geboul nie en dis gewoonlik ’n plek waar snelboulers baljaar,” het Tait gister gesê.
“Die kolfblaaie bied boonop heelwat ondersteuning aan die vinnige manne.”
Volgens Anil Kumble, kaptein van die Challengers, sal Jacques Kallis en Dale Steyn se kennis van plaaslike toestande handig te pas kom, wanneer dié span Sondag in Centurion met Guyana swaarde kruis.
“Hulle is spelers van wêreldgehalte en hul ervaring – veral in Suid-Afrika – kan aan ons ’n voorsprong besorg,” het Kumble gesê.