Engelse kolwers is nou éérs onder druk
2012-02-05 21:36
Sportredaksie, Sapa-AFP en Reuters
DOEBAI. – Die Engelse krieketspan se sukkelende kolwers gaan vandag die kans kry om hul kritici verkeerd te bewys wanneer die derde toets teen Pakistan hier hervat word.
Pakistan is gister in sy tweede beurt vir 365 uitgehaal en het Engeland ’n teiken van 324 lopies gestel om ’n sege te behaal.
Engeland het gister met die uitskeityd 36 sonder verlies bereik.
Die teiken is nie onmoontlik nie, maar gegewe dat die Engelse in die laaste toets net 72 kon kry toe hulle 145 vir ’n sege moes aanteken, is niks gewaarborg nie.
Nog meer so as in ag geneem word dat die twee Pakistanse draaiers Saeed Ajmal en Abdur Rehman ’n sielkundige houvas op die Engelse kolwers het.
Die twee draaiers het sover 37 van die 50 Engelse paaltjies in die reeks laat kantel en hulle sal straks vandag weer ’n sê in die uitslag hê.
Dit is steeds verstommend dat Pakistan só stewig in die toets staan nadat hy in sy eerste beurt vir slegs 99 uitgeboul is.
Die laaste keer wat ’n span vir só min in die eerste beurt van ’n toets uitgeboul is en steeds die toets gewen het, was voor die Tweede Anglo-Boereoorlog toe Engeland (92) dit teen Suid-Afrika op Nuweland vermag het.
Die Pakistanse kolwers Younis Khan (127; 303 minute, 221 balle, 12x4, 1x6) en Azhar Ali (157; 533 m, 442 b, 10x4, 1x6) het die terugvegpoging gelei.
Die twee het ’n vennootskap van 216 lopies om die derde paaltjie gedeel en dit sal heel waarskynlik die verskil tussen die twee spanne wees.
Die opflikkering wat Indië op sy nagmerrie-toer in Australië beleef het, het toe nie lank geduur nie.
’n Sege in die tweede t20-stryd teen die Aussies is gister met ’n nederlaag in die eerste wedstryd van die driehoekige kitsreeks opgevolg..
Australië het dié reëngeteisterde wedstryd in Melbourne met 65 lopies gewen.
Die Aussies het eerste gekolf en het danksy 67 (69 b; 4x4, 2x6) deur Matthew Wade en ’n blitsige 61 (30 balle, 4x4, 3x6) deur David Hussey 216/5 in hul 32 boulbeurte opgestapel.
Indië het gesukkel nadat Sachin Tendulkar (2) en Gautam Gambhir (0) in die eerste vier boulbeurte uit is.
Clint McKay (4/20) was die beste Aussiebouler.
Die Aussie-blitsbouler Brett Lee sal die res van die reeks weens ’n gebreekte beentjie in sy regtervoet misloop.