Reeza geprys ná hy lopies inryg
2012-02-06 22:05
KIMBERLEY. – Dit is nie moeilik om te verstaan waarom die Knights-breier, Sarel Cilliers, opgewonde raak as hy oor Reeza Hendricks gesels nie.
Hy is dalk nog net 22 jaar oud, maar waar Hendricks tekort skiet aan ervaring, maak hy ruimskoots met die kolf voor op.
Dit het die produk van Griekwas die naweek in die Knights se SuperSport-krieketstryd teen die Cobras in die Kaap opnuut bewys. Hy het sy 124 lopies in die eerste beurt met 82 in die tweede opgevolg en is nou die naasvoorste lopiemaker in dié reeks.
Hy het in 9 meerdagwedstryde dié seisoen, in 18 kolfbeurte, reeds 733 lopies opgestapel. Dit is net 18 lopies minder as die voorste kolwer, die Lions se Niel McKenzie.
Hendricks het al verlede jaar vir die Suid-Afrikaanse Opkomende span indruk gemaak. En te oordeel na sy kolfvertonings tans is dit nie vergesog nie om te dink dat hy in die nabye toekoms vir nasionale diens nader getrek kan word.
“Reeza se spelpeil toon beslis ’n opwaartse kurwe. Hy het hom reeds verlede jaar vir die Suid-Afrikaanse Opkomendes laat geld en ook die naweek teen van die land se voorste boulers. Hy toon baie volwassenheid,” het Cilliers gister gesê. “Hopelik kan hy vanjaar die SA A-span haal of selfs hoër louere verdien.”
Hendricks het teen Protea-boulers soos Justin Ontong en Vernon Philander sy man gestaan in die SuperSport-wedstryd teen die Cobras, maar hy is ook uitgeknip vir eendagkrieket, aldus Cilliers.
“Reeza kan in al die formate van die spel ingespan word. Hy het reeds bewys hy kan oral speel. Hy is beslis nie net ’n meerdaagse speler nie.”
Philander was die groot doring in die Knights se vlees. Hy het nege paaltjies laat kantel, sewe daarvan in die eerste kolfbeurt.
Hy is dus nie verniet die suinigste bouler in die reeks nie. In 4 SuperSport-wedstryde het hy 903 aflewerings afgestuur, net 347 lopies afgestaan en 23 paaltjies laat kantel. Elke paaltjie het hom gemiddeld 15.08 lopies gekos.
“Vernon het twee jaar gelede presies dieselfde ding gedoen. Ons het 130 lopies vir ’n sege benodig en hy het ingekom en ons uitgeboul,” het Cilliers gesê.