Sachin (203) kasty Sri Lanka
2010-07-29 22:38
JOHANNESBURG
Sachin Tendulkar het gister in Colombo met sy vyfde dubbele honderdtal op eie houtjie Indië se hoop om die reekslouere met Sri Lanka te deel, lewend gehou.
’n Onbesliste uitslag is nou onvermydelik nadat dié 37-jarige kolfmaestro op die voorlaaste dag van die tweede toets vir langer as agt uur walgegooi het in sy spogbeurt van 203 lopies (347 balle, 23x4, 1x6).
Dít, nadat ’n tweede agtereenvolgende opvolgbeurt die besoekers vroeër (op 241/4) in die gesig gestaar het in antwoord op Sri Lanka se yslike 642/4.
Die tuisspan is met 1-0 voor in die reeks van drie toetse nadat hy die eerste kragmeting in Galle met 10 paaltjies gewen het.
Danksy ’n vennootskap van 256 lopies om die vyfde paaltjie tussen Tendulkar en Suresh Raina (120, 228 b,12x4, 2x6) kon hul afrigter, Gary Kirsten, en spanmaats op 669/9 gaan slaap.
Met dié beurt het Raina, wat op die nippertjie ingesluit is in die plek van die olike Yuvraj Singh, net die negende Indiër tot nog toe geword wat die driesyfer-kerf in sy eerste toets behaal.
Hy is kort ná middagete deur Ajantha Mendis (4/157) uitoorlê, maar stééds kon die Sri Lankane nie die lopiekrane toedraai nie.
Tendulkar en Mahendra Singh Dhoni (76, 138 b, 7x4), het ’n verdere 95 lopies om die sesde paaltjie bygedra voordat die Indiese kaptein en Abhimanyu Mithun (41, 97 b, 4x4) saam nog 51 lopies opgestapel het ná Tendulkar se vertrek.
Terselfdertyd kon Sri Lanka nie die gate toestop nie, wat die afwesigheid van Muttiah Muralitharan en Lasith Malinga gelaat het op ’n kolfblad waarop net 13 paaltjies in meer as 360 boulbeurte platgetrek kon word.
Dié twee het altesame 15 van die 20 Indiese paaltjies in Galle laat kantel, maar kon weens onderskeidelik uittrede en ’n besering nie oorweeg word nie.
Die laaste toets begin Dinsdag in Colombo.