Bok-twis eis Bakkies

PRETORIA

’n Nuwe rugbytwis tussen provinsies oor die beskikbaarheid al dan nie van gekontrakteerde Springbokke vir die res van die Curriebeker-seisoen, het gister losgebars en SA Rugby geen keuse gelaat nie as om dié spelers aan die reeks te onttrek.

Dié twis volg nadat die Springbok-bestuur op 7 Mei op ’n vergadering met die vernaamste unies ooreengekom het dat al die gekontrakteerde spelers na afloop van die Drienasies-reeks nie in wedstryde sal speel nie.

Spelers soos Bismarck du Plessis en Adrian Jacobs is egter weens beserings nog glad nie vir die Bokke oorweeg nie, hoewel Du Plessis reeds die afgelope maand of wat vir die Haaie in die Curriebeker-reeks uitgedraf het.

Jacobs het pas weer begin speel.

Bakkies Botha, wat maar twee Super14-wedstryde en drie toetse vir die Bokke gespeel het, sou ná ’n skorsing van nege weke ook Saterdag tot die veld terugkeer.

Sport24 kan vandag onthul dat die Westelike Provinsie, Vrystaat en die Haaie beswaar aangeteken het teen die insluiting van enige gekontrakteerde Bokke vir dié naweek se Curriebeker-rugby.

Veral Botha se insluiting by die Blou Bulle het die meeste reaksie ontlok.

Die Blou Bulle het dus geen ander keuse gehad nie as om Botha uit die span te laat wat Saterdag in Bloemfontein teen die Vrystaat speel.

Die Bulle se voorspeler-afrigter, Johann van Graan, het gesê Botha is eers gisteroggend meegedeel dat hy nie die naweek kan speel nie.

“Bakkies was baie teleurgesteld. Hy het die laaste nege weke baie hard aan sy kondisionering gewerk en was gretig om op die veld te kom.

Hy wou bitter graag speel. Dit is egter nie ons besluit nie en Bakkies verstaan dit ook nie lekker nie. Hy het beslis die tyd op die veld nodig.”

Die unie gaan egter nie sy belofte verbreek dat Gurthrö Steenkamp vir die volgende maand aan die Curriebeker-reeks onttrek gaan word nie.

Steenkamp het nie ’n Bok-kontrak nie, maar het die hele Super14 en in feitlik al die Springbok-toetse vanjaar gespeel.

Dié optrede is in nasionale belang, het die Bulle se afrigter, Frans Ludeke, gesê.

Botha (Blou Bulle), Jacobs (Haaie) en Ricky Januarie (WP) gaan dus nié in die volgende paar weke broodnodige wedstrydoefening kry nadat hulle skaars dié seisoen gespeel het nie.

Ook CJ van der Linde, wat net vir die Curriebeker-reeks deur die Cheetahs gekontrakteer is, gaan weinig waarde vir dié provinsie hê.

Dit steek ook ’n ernstige stok in die wiel van die nasionale afrigter, Peter de Villiers, se planne vir die Springbokke se toer na Ierland en die Verenigde Koninkryk.

Die Bokke vertrek in November op ’n Grand Slam-toer en speel in toetse teen Ierland, Skotland, Wallis en Engeland én in ’n wedstryd teen die Britse Barbarians.

Die getal wedstryde en minute op die veld wat sekere senior spelers, onder wie John Smit, Victor Matfield, Pierre Spies en Morné Steyn, vanjaar reeds gespeel het, het De Villiers verlede week laat erken dat dié spelers heeltemal te veel rugby gespeel het.

’n Ruskans en waardevolle kondisionering vir hulle is noodsaaklik, maar so ook was speeltyd vir spelers soos Botha, Jacobs, Januarie en selfs Du Plessis en Beast Mtawarira.

Lede in die Bok-bestuurspan is glo erg omgekrap oor dié toedrag van sake.

Die ommeswaai oor sekere spelers en die realiteit dat moeë spelers (soos Steenkamp) mág speel en uitgeruste spelers (Jacobs en Botha) nié, laat die hele kondisioneringsprogram soos ’n grap lyk, word gesê.

Die Bok-bestuurslede is veral ontevrede omdat hulle geen sê in die verband het nie, maar soos die skuldiges en onbeholpe lyk.

Die groep wat tot 6 Oktober nie sal speel nie, is: Victor Matfield, Danie Rossouw, Bakkies Botha, Wynand Olivier, Morné Steyn, Fourie du Preez, Pierre Spies (almal Blou Bulle), John Smit, Bismarck du Plessis, Tendai Mtawarira, JP Pietersen, Adrian Jacobs (Haaie), Schalk Burger, Jaque Fourie, Bryan Habana, Ricky Januarie, Andries Bekker (almal WP), Juan Smith, Heinrich Brüssow en CJ van der Linde (almal Vrystaat-Cheetahs).