Cheetahs ‘rus met vertroue’ ná sege
2010-03-09 22:43
BLOEMFONTEIN
Ná hul beste vertoning in die Super14-reeks teen die Hurricanes sou die Cheetahs waarskynlik dadelik op hul goeie spelpeil wou voortbou, maar die span se breiers meen nie sy loslootjie sal hom pootjie nie.
Dié rugbyspan en die Blues sal nie die naweek in aksie wees nie. Die Cheetahs speel eers weer aanstaande Saterdag – teen die Stormers op Nuweland in Kaapstad.
Die spelers is ná die sege van 28-12 oor die Hurricanes ’n welverdiende blaaskans gegun en sal eers weer môre saamtrek om vir die Stormers-kragmeting te begin slyp.
Die Cheetahs het met hul oorwinning oor die ’Canes gewys hulle wil méér doen as net meeding.
Daarom meen Naka Drotské, die Cheetahs-breier, dat hoewel die loslootjie nou nie ideaal is nie, sy span met selfvertroue kan rus.
“Ons sou graag die wenmomentum wou behou, maar daar is niks wat ons aan die loslootjie kan doen nie – dis tog immers al lankal voor die reeks so bepaal.
“Dalk is dit ’n goeie ding dat ons met selfvertroue kan rus,” sê hy.
Daarmee bedoel die breier beslis nie dat sy span oorgerus sal raak nie.
Volgens hom is dit uiters belangrik dat die Cheetahs veral op hul laaste twee wedstryde in Suid-Afrika – dié teen die Stormers en hier teen die Reds – moet fokus, voordat hulle op die vliegtuig vir die taai toer na Australasië klim.
“Ons moet aangeskakel bly vir die twee wedstryde in Suid-Afrika voor ons op toer gaan.
“Dis belangrik om positief te bly voor die toer.”
Juis met die Cheetahs se wissevalligheid in gedagte, sou ondersteuners dalk eerder wou hê hul span moet die wenmomentum behou as om vir ’n wyle laag te lê.
Almal weet dié streekspan kan op sy beste enige teenstander laat les opsê. Maar dis die Cheetahs se onvermoë om agtereenvolgende seges te behaal wat steeds by die span spook.
Die Cheetahs kon laas in 2006 in die Super-reeks twee of meer wedstryde ná mekaar wen. Daardie jaar het hulle juis agtereenvolgens met die Hurricanes, Stormers en Reds afgereken.
Hulle het vanjaar tussen hul seges oor die Sharks en Hurricanes teen die Highlanders vasgeval.