Diepte is daar, wys Blou Bulle
2012-02-10 21:43
- Artikelopsies
- Deel
- Kry Beeld op
PRETORIA. – ’n Gerusstellende wete dat sy diepte daar is, nog meer gerusstellende nuus dat Rayno Gerber steeds dieselfde ou yster is van vóór Frankryk se eskapades en ’n opwindende vooruitblik op die toekoms – en sy naam is Daniel Adongo.
Dié Keniaan, wat verlede jaar nog by die Sharks was, het drie keer gaan druk en hoewel dit almal ná voorspelerdryfspel was, was dit eerder sy spel in die los wat beïndruk het.
Dit was die pluspunte vir die Blou Bulle ná hul vriendskaplike wedstryd hier op Loftus Versfeld se B-veld in ’n sege van 33-29 oor hul eweknieë van die Vrystaat, maar die besoekers sou self redelik rustig gaan slaap het ná die redelik gelykop-stryd.
Die besoekers het twee kanse om pale toe te mik in die laaste minute verspeel en eerder kantlyn toe gemik, maar deurkomkans was min.
Dit was ’n taaie dié, met die spanne wat baie goed teen mekaar opgeweeg het.
Die Vrystaat se krag het gelê in hul voorspelers se dryfspel, terwyl die Bulle se beste spel uit gebroke spel voortgevloei het.
Dít was wanneer Adongo en Jean Cook in spel gekom het.
Sias Ebersohn het die telbord aan die rol gekry en daarna was dit wipplank tot die einde.
Cook het gedruk voordat Lourens Adriaanse oorgedryf is. Daarna is Adongo een keer voor en twee keer ná rustyd oorgedryf en Marcel van der Merwe is oor nadat sý pak hard in die loopgraaf geveg het. Barry Geel het ná ’n goeie teenaanval gedruk voordat ’n wegholdrie deur Sampie Mastriet die Bulle laat asemskep het.
’n Drie deur Dusty Noble het weer albei spanne die wenpaal laat sien.
Gerber, Cook, Adonga en Ulrich Beyers het gewoel vir die wenspan.
Adriaanse, Riaan Smit en Noble was hul span se uitblinkers.
- Puntemakers:
Blou Bulle 33 (12): Drieë: Daniel Adongo (3), Jean Cook, Sampie Mastriet. Doelskoppe: Lionel Cronjé (4).
Vrystaat 29 (17): Drieë: Lourens Adriaanse, Marcell van der Merwe, Barry Geel, Dusty Noble. Doelskoppe: Sias Ebersohn (2), Riaan Smit. Strafdoel: Ebersohn.