Haaie wil só toeslaan

JOHANNESBURG

Die Haaie se grofgeskut is vir môre se Curriebeker-rugbywedstryd teen die Vrystaat-Cheetahs in Bloemfontein op die plaasvervangersbank.

Met drie Springbokke – Ruan Pienaar, Jean Deysel en Beast Mtawarira – en die stewige losvoorspeler Willem Alberts wat sake aanvanklik van die kantlyn gaan dophou, sal die Haaie waarskynlik probeer om in die tweede helfte ’n groot impak te maak.

Vier veranderinge is aan die span gemaak wat gesukkel het om die Pumas te klop. In die enigste verandering aan die agterlyn keer Steve Meyer terug as losskakel ná sy enkelbesering.

Die Haaie se voorste driedrukker, Keegan Daniel, skuif van agtsteman na flank om plek te maak vir Ryan Kankowski, een van die terugkerende Bokke.

Hy is die enigste van die Bok-afrigter, Peter de Villiers, se stert tussen die bene-Bokke wat in die beginspan is.

Die slot Alistair Har­greaves sukkel met ’n kuitbesering en dit gee aan die oud-Kapenaar Ross Skeate die kans om die eerste keer vir die Haaie te begin.

John Plumtree, die Haaie se afrigter, erken Alberts, Deysel en Mtawarira sal in die tweede helfte ’n belangrike rol hê.

Wanneer die asems begin jaag, sal hulle hul toetrede maak en met hul kragspel die Cheetahs op die agtervoet moet probeer dwing.

“Hulle sal die tempo van die spel moet verhoog,” sê die Durbaniete se breier.

Pienaar kan as losskakel óf skrumskakel ook ’n beduidende invloed op die spel in die laaste deel hê.

Omdat dié veelsydige Bok vroeër vrygestel is om na die Ierse klub Ulster te gaan, het hy net ’n maand oor in die Haaie se trui.

Die Haaie-span is:
Louis Ludik, JP Pietersen, Stefan Terblanche (k), Patrick Lambie, Lwazi Mvovo, Steve Meyer, Charl McLeod, Ryan Kankowski, Keegan Daniel, Jacques Botes, Ross Skeate, Steven Sykes, Wiehahn Herbst, Craig Burden, Patric Cilliers.
PLAASVERVANGERS: Kyle Cooper, Beast Mtawarira, Eugene van Staden, Willem Alberts, Jean Deysel, Ruan Pienaar, Andries Strauss.