Hulle het Kaap-kloue
2010-07-29 22:38
KAAPSTAD
Dis ’n Pumas-span met ’n Kaapse geur wat vanaand na Nuweland opruk en daarom sal die Westelike Provinsie op sy tone vir dié Curriebeker-rugbystryd moet wees.
Dis veral die besoekers se twee losskakels – Elgar Watts en Ricardo Croy – wat ’n punt sal wil bewys. Watts het aan die einde van 2008 die Boland se Premierliga-status vir nog ’n seisoen help verseker met ’n puik individuele vertoning in ’n promosie-relegasie-wedstryd teen die Griffons in Wellington.
Die 24-jarige oud-Bolander het toe in ’n sege van 54-15 vier drieë gedruk en het twee naweke gelede ook ’n puik dag met ’n driekuns teen die Luiperds gehad.
Watts het in 2009 nie werklik vir die Kavaliers beïndruk nie, maar as hy die dag op sy stukke is, hou sy kreatiwiteit en balverspreiding ’n wesenlike gevaar in.
Sou hy nie die mas opkom nie, kan die Pumas hulle altyd op Croy beroep.
Dié voormalige WP-speler het verlede week die Pumas se nr. 10-trui gedra en verlede jaar ook 20 van die SWD se punte aangeteken toe hy die WP se Vodacombeker-span met 28-19 geklop het.
Allistair Kettledas se 18 drieë in 2009 se opmars na promosie uit die Eerste Liga getuig ook van die gevaar wat die voormalige SWD-vleuel inhou.
Onder die losvoorspelers is Junior Bester ook ’n oud-Bolander.
Voeg daarby dat die Pumas verlede week met die aanbreek van rustyd teen die Haaie in Durban voorgeloop het, en jy besef dat die WP niks as vanselfsprekend moet aanvaar nie.
Die Streeptruie se ondersteuners sal nietemin niks anders nie as ’n roetine-sege verwag. Hulle is bo-aan die puntelys en die agterlyn is boonop vandeesweek met Juan de Jongh en Gio Aplon op buitesenter en regtervleuel onderskeidelik versterk.
Die spanne is:
WP: Conrad Jantjes, Gio Aplon, Juan de Jongh, Paul Bosch, Frikkie Welsh, Willem de Waal, Conrad Hoffmann, Duane Vermeulen, Rynhardt Elstadt, Pieter Louw, Anton van Zyl (k), Adriaan Fondse, Brok Harris, Tiaan Liebenberg, JD Moller.
PLAASVERVANGERS: Hanyani Shimange, JC Kritzinger, Martin Muller, Pieter Myburgh, Louis Schreuder, Lionel Cronjé, JJ Engelbrecht.
Pumas: Carl Bezuidenhout, Ashwin Scott, Tiaan Marx, Siviwe Magaba, Allistair Kettledas, Elgar Watts, Jacques Coetzee, Christo le Roux, Junior Bester, Corné Steenkamp, Marius Coetzer, Willem Serfontein, Ashley Buys, Hannes Franklin, Ronnie Uys.
PLAASVERVANGERS: DJ Terblanche, Dawie Steyn, Torsten van Jaarsveld, Andries Kruger, Pieter Meyer, Shaun Venter, Ricardo Croy.
Skeidsregter: Pro Legoete.