Nét vier skrums in Baaise stryd
2012-02-05 21:36
PORT ELIZABETH. – Die manne met die blomkoolore wat ná rugbywedstryde eerder oor die stryd in die vaste skrums as oor die uitslag gesels, was Saterdag hier stomgeslaan ná die wedstryd tussen die Southern Kings en die Bulls.
Die Bulls het dié vriendskaplike kragmeting in die Nelson Mandelabaai-stadion met 16-12 gewen.
In die hele wedstryd was daar net vier vaste skrums en die eerste een het eers in die 14de minuut van die tweede helfte plaasgevind.
“Dit was baie eienaardig,” het Frans Ludeke, afrigter van die wenspan, gesê.
Hy sou dalk meer skrums wou gesien het, want in een het sy agttal ’n vaskop gehaak.
Dit was ’n ligte verrassing, want verlede seisoen was die Kings se skrumwerk een van hul sterkpunte.
Albei spanne was bra verroes en het baie strafskoppe afgestaan. Dit het daartoe gelei dat die wedstryd nie mooi aan die gang kon kom nie.
Die wedstryd het ’n halfuur laat afgeskop nadat die Bulls se bagasie vir ’n wyle soek was.
“Ons het eers vanoggend (Saterdagoggend) hierheen gevlieg en toe gevind van ons bagasie het agtergebly.
Dit het toe darem aangekom, maar om veilig te speel het ons gevra dat die wedstryd later begin,” het Ludeke gesê.
Volgens hom het sy spelers hulle nie aan dié “kleinigheidjie” gesteur nie.
Dit het ook nie so gelyk nie, want dit was die Bulls wat die beste begin het en 13 van hul 16 punte binne die eerste 15 minute aangeteken het.
Hulle is aangevuur deur ’n hele klompie Bulls-ondersteuners wat trots was op hul span se diepte.
Hoewel dit nie die Bulls se beste span was nie, was daar verskeie puik spelers wat dit nog ver kan bring.