OP-Kings soek geskenk vir breier
2010-07-29 22:38
’n Sege oor die Bolandse rugbyspan sal nie ’n slegte verjaardaggeskenk vir Alan Solomons, die afrigter van die Oostelike Provinsie-Kings, wees nie.
Solomons word môre 60 jaar oud. Dieselfde dag speel die OP in Wellington teen die Boland-Kavaliers in ’n wedstryd in die Curriebeker-reeks se Eerste Liga.
“Dit sal lekker wees as ons vir Solly ’n ekstra geskenk kan gee, maar ons verwag geen gunsies van die Boland nie,” het De Wet Barry, die OP-kaptein, gister gesê.
“Selfs toe ek vir die Westelike Provinsie gespeel het, het ons geweet dat jy harde bene gaan kou as jy in Wellington teen die Kavaliers speel.
“Hulle het nou weer ’n span wat ’n paar ervare, taai spelers insluit. Maar ons het hard gewerk en sien uit na die kragmeting.”
Volgens Barry is Solomons ’n breier wat weet hoe om die beste uit sy spelers te haal. “Hy is verskriklik positief. Hy het soveel ervaring as ’n afrigter en die manier waarop hy met die spelers werk, is baie professioneel.”
Die skrumskakel Donald Stevens, een van die jonger spelers in die span, het sy woorde beaam.
“Jy weet presies waar jy met hom staan. Hy het ook die gawe om jou deeglik te laat verstaan wat hy van jou verwag en hoe jy dit moet doen,” het Stevens gesê.
Op die oefenveld beweeg Solomons soms soos ’n roofdier.
Sy oë mis byna niks.