Sharks se afrigter goed die hoenders in
2010-03-07 22:21
- Artikelopsies
- Deel
- Kry Beeld op
JOHANNESBURG
John Plumtree, afrigter van die Sharks se rugbyspan, het gister vuur gespuug oor die Australiese skeidsregter se vertoning in sy span se nederlaag van 21-25 teen die Waratahs in die Super14-reeks.
Plumtree het geen twyfel gelaat nie dat hy glo van John Marks se beslissings sy span Saterdag die wedstryd in Sydney gekos het.
Marks en sy assistent-skeidsregter Stephen Hardy, ’n Aussie wat in Suid-Afrika gebore is, het verkies om die Sharks se pleidooi vir ’n strafdrie in die laaste paar minute van die hand te wys.
’n Aangee van Stefan Terblanche na Ryan Kankowski is deur die plaasvervanger-agterspeler Kurtley Beale afgeklap.
Hoewel Beale met ’n geel kaart gestraf is, meen die Sharks dit moes ’n strafdrie gewees het, aangesien Kankowski ’n oop doellyn voor hom gehad het.
“Dit was ’n siniese besluit deur die skeidsregter. Dit moes beslis ’n strafdrie gewees het en dan het ons die wedstryd gewen,” het ’n omgekrapte Plumtree gesê.
Om nog olie op die vuur te gooi, het Marks kort daarna, met die Sharks wat stewig van ’n lynstaan af doellyn toe gedryf het, besluit daar is obstruksie gepleeg.
Dit was net so ’n omstrede beslissing om nie eens te praat nie van die Waratahs se drie wat die televisie-skeidsregter aan die senter Tom Carter toegeken het.
Hy het beslis Carter het wel die bal agter die doellyn gedruk, terwyl dit gewis nie met sekerheid, selfs ná verskeie kykweers, gesien kon word nie.
Plumtree meen ook die Waratahs se kaptein en flank, Phil Waugh, is toegelaat om by die afbreekpunte met moord weg te kom.
“Sy ongeoorloofde spel het dit moeilik vir ons gemaak om aan die gang te kom, maar die skeidsregter het net mooi niks daaraan gedoen nie.”
Hy het darem ook bygevoeg dat basiese foute sy span duur te staan gekom het en hy genoeg kanse gehad het om te wen, maar dit nie benut het nie.
Die Sharks, wat rustyd met 14-18 agter was, het in die tweede helfte veel meer karakter getoon.
Puntemakers:
Waratahs 25 (18): Drieë: Daniel Halangahu, Tom Carter, Tatafu Polota-Nau. Doelskoppe: Berrick Barnes (2). Strafskoppe: Barnes (2). Sharks 21 (14): Drieë: Ryan Kankowski, Adrian Jacobs. Doelskop: Andy Goode. Strafskoppe: Goode, Ruan Pienaar. Skepdoel: Goode.