Super14-spelers gee Vodacombeker-spanne skop
2010-03-07 22:21
BLOEMFONTEIN
Die ervaring van Super14-spelers het ’n groot sê in die uitslae van Saterdag se Vodacombeker-rugbywedstryde gehad.
In Kaapstad het die Westelike Provinsie se Stormers-losskakel, Willem de Waal, sy span met ’n persoonlike bydrae van 16 punte tot ’n oorwinning van 26-23 oor die Sharks-vyftiental geskop.
Die WP het dié sege ook aan goeie verdediging te danke.
Puntemakers:
Westelike Provinsie 26: Drieë: Jurgens Visser, Yaya Hartzenberg. Doelskoppe: Willem de Waal (2). Strafdoele: De Waal (4). Sharks-vyftiental 23: Drieë: Justin Downey, Jerome Pretorius. Doelskoppe: Jacques Venter, Ross Cronjé. Strafdoele: Venter (3).
In Nigel het die Lions se skrumskakel Chris Jonck 14 van die Leeus se punte in hul sege van 34-13 oor die Valke behaal. Ander Super14-spelers soos Jannie Boshoff (vleuel/senter) tel ook tussen die puntemakers.
Puntemakers:
Leeus 34: Drieë: Chris Jonck, Johan van Deventer, Justin Wheeler, Wigan Pekeur, Jannie Boshoff. Doelskoppe: Ruan Boshoff, Jonck (2). Strafdoele: Boshoff. Valke 13: Drie: Nico Engelbrecht. Doelskop: Jacques George. Strafdoele: Deon Anderson (2).
Skipper Badenhorst, ’n voormalige haker van die Sharks, het hier twee drieë in die Vrystaat se sege van 37-29 oor die Boland gedruk.
Die Vrystaters sal beslis ’n bestendige skopper moet vind. Sias Ebersohn (losskakel), George Whitehead (heelagter) en Louis Strydom (plaasvervanger-losskakel) het tussen hulle met vier strafskoppe en twee doelskoppe misluk.
Daarteenoor het die Bolanders se losskakel, Dean Grant, sy teenstanders ’n skoples gegee en 19 punte aangeteken, berig Jóhann Thormáhlen.
Puntemakers:
Vrystaat 37: Drieë: Ashley Johnson, Skipper Badenhorst (2), Rudi Mathee. Doelskop: George Whitehead. Strafdoele: Whitehead (3), Louis Strydom (2). Boland 29: Drieë: PJ Vermeulen, Jaquin Jansen. Doelskoppe: Dean Grant (2). Strafdoele: Grant (5).
David Maidza, breier van die Bulldogs, sê Chumani Booi kan nie vir die nederlaag teen die Oostelike Provinsie in Queenstown verkwalik word nie, berig Michael Green.
Booi het met ’n strafskop misluk en die OP-Olifante het met 34-32 geseëvier.
Die OP kan deur die oud-WP-losvoorspeler Pietie Ferreira en gewese Cheetahs-flank Darron Nel versterk word.
?Puntemakers:
Olifante 34: Drieë: Justin Peach, Howard Noble (2), Pumlani Nodikita, Marlon Lewis. Doelskoppe: Peach (3). Strafdoel: Peach. Bulldogs 32: Drieë: Thembani Mkokeli, Andisa Gqobo (2), Siyabonga Tshemese. Doelskoppe: Chumani Booi (3). Strafdoele: Booi (2).
Ná twee rondes is die Leeus met 9 punte die vroeë voorloper in die Noordelike afdeling. Die Leeus word deur die Blou Bulle (9), Luiperds (7), Griekwas (6), Griffons (6), Pumas (5), Valke (0) en Welwitschias (0) gevolg.
Die Vrystaat is met 10 punte die voorloper in die Suidelike afdeling, gevolg deur die OP (7), Sharks-vyftiental (6), Boland (5), WP (4), Pampas (3), Grens (2) en die Suidwestelike Distrikte (0).
Die Pampas en SWD is die enigste spanne wat nog net een wedstryd gespeel het.