Verdoemende Bok-klag
2010-09-05 22:25
BLOEMFONTEIN
Laaste, eerste, laaste.
Dít is die Drienasies-rekord van die Springbok-rugbyspan onder sy breier, Peter de Villiers, en beslis nie een waarop hy óf die span trots kan wees nie.
Trouens, dié vertonings deur die Bokke in die afgelope twee maande was sekerlik die swakste in ’n lang tyd en het selfs die gru-seisoen van 2006 in die skadu gestel.
Waar dié span in 2008, toe hy ook laaste op die puntelys was, ’n geskiedkundige oorwinning in Dunedin en ’n rekordsege oor die Wallabies behaal het, was die 2010-veldtog van meet af aan tot mislukking gedoem.
Hy het nie een sege op die toer in Nieu-Seeland en Australië behaal nie.
Dáár het ongedissiplineerde spel tot vier geelkaarte en drie skorsings gelei.
En hoewel beter gespeel is in die plaaslike wedstryde van die reeks het die span nooit van die letsels van veral Eden Park en Brisbane herstel nie.
Vanjaar sal veral vir die skokkende verdediging deur die Bokke onthou word.
Hulle was die bonuspunt-melkkoeie in die reeks en het in net een wedstryd nié bonuspunte afgestaan nie.
Die 22 drieë wat die span weggegee het, is die meeste nog in die reeks.
Hoewel De Villiers Saterdagaand hier halsstarrig was oor ’n moontlike aanstelling van ’n verdedigingsafrigter, kan dit nie langer uitgestel word nie – veral nie as die afrigter sy pos wil behou nie.
“Karakter is die belangrikste aspek van verdediging en dié span hét karakter,” het De Villiers gesê.
Die 22 drieë is ’n verdoemde klag teen daardie aansprake van karakter, as dit die breier se vernaamste verweer is.
Die lede van sy bestuurspan en hul bydrae moet ook onder die loep geneem word.
Die insluiting van Os du Randt as skrumdokter was ’n geslaagde en positiewe stap, maar Dick Muir en Gary Gold se bydraes was nie so opsigtelik nie.
Trouens, as na die Bok-kaptein, John Smit, se opsomming oor die 2010-veldtog geluister word, het geen van die afrigters hul ruim salaris verdien nie.
“Ons is nie tans goed genoeg nie en daar wag harde werk,” het hy gesê.
Die kaptein se spelpeil was wisselvallig, maar nie naastenby so erg soos die van die puntemasjien-vleuel Bryan Habana nie.
Daar was darem ligpunte ook. Morné Steyn is met 77 punte die voorste puntemaker in die reeks.
Gurthrö Steenkamp was die voorste driedrukker en het drie keer die Wallabies se lyn oorgesteek.
Hy was waarskynlik die Bokke se beste speler in die reeks.
Die insluiting van Francois Hougaard behoort darem vir De Villiers ’n klop op die skouer te verdien.
