Vrystaat pak bank met Bokke

BLOEMFONTEIN

Die afrigter van die Vrystaat, Naka Drotské, sê sy plaasvervangersbank is met drie Springbokke – die stut CJ van der Linde, die flank Kabamba Floors en die senter Meyer Bosman – die sterkste sedert 2007.

Die ses Springbokke wat môre hier as plaasvervangers langs die kantlyn sit, sal volgens hom ’n groot invloed op die uitslag van die Curriebeker-rugbywedstryd tussen die Vrystaat en die Haaie hê.

Met die stut Beast Mtawarira, die flank Jean Deysel en die skrumskakel Ruan Pienaar is die Haaie se bank self gelaai met Bokke en kan die uitslag tot in die laaste paar sekondes in die weegskaal wees.

“?’n Plaasvervangersbank met ware spelbrekers was sedert 2007 dalk ’n tekortkoming in ons mondering,” sê Drotské.

“Maar verlede naweek teen die Blou Bulle het ons bank werklik groot impak gemaak en ek verwag môre dieselfde in die tweede helfte wat intensiteit betref.

“Almal weet hoe eksplosief CJ as ’n baldraer is en almal ken vir Kabamba.

“Meyer kan ’n ewe groot invloed hê.”

Baie is môre vir Van der Linde en Mtawarira op die spel, aangesien albei die Bok-keurders wil oortuig dat hulle onderskeidelik die nr. 1- en nr. 3-trui op 21 Augustus teen die Wallabies op Soccer City moet dra.

Van der Linde was in die laaste Drienasies-toets teen die Wallabies in aksie, terwyl Mtawarira verroes is en enige speelkans sal verwelkom.

Drotské glo die skrumskakel Tertius Carse en die losskakel Sias Ebersohn sal, soos teen die Blou Bulle, weer ’n groot impak maak.

Ebersohn bevind hom ná sy goeie vertoning teen die Ligbloues steeds op die bank, aangesien Louis Strydom se betroubare skopskoen verseker dat hy die nr. 10-trui dra.

Strydom se suksessyfer met sy stelskopwerk op die oefenveld is nogal heelwat beter as Ebersohn s’n.

Strydom kry ook nie die erkenning vir sy goeie taktiese skopwerk in die seges oor Griekwaland-Wes en die Blou Bulle nie.

Carse sit ook weens sy skopwerk op die bank, met Tewis de Bruyn wat ’n beter skopper is.

Maar soos hulle teen die Ligbloues bewys het, is Carse en Ebersohn op hul gevaarlikste wanneer die Cheetahs in die laaste paar minute die “boeie ­afskud” en die bal behoorlik lug gee.