Oos-Rand: Beste jong boer van Nigel
2009-11-25 06:36
Suid-Afrika se beste jong boer woel aan die Oos-Rand.
Tony da Costa, ’n boer van Nigel, is vroeër die maand aangewys as vanjaar se Toyota SA/Agri jong boer van die jaar.
Tony was een van nege provinsiale finaliste in die kompetisie, wat reeds die afgelope ses jaar aangebied word.
Marius Vorster, adjunkpresident van bemarkingskommunikasie en beplanning by Toyota Suid-Afrika, het namens die borg prysgeld van R100 000 aan Tony oorhandig.
“Toyota geniet volgehoue steun uit die landbousektor.
Ons borgskap van die jong boer van die jaar-wedstryd laat ons toe om vir die sektor ons waardering vir hul ondersteuning te wys en om erkenning te gee aan die kritieke rol wat boerdery vervul.
“Die markleierskap wat Toyota oor die afgelope 29 jaar geniet het, is moontlik gemaak deur die ondersteuning van die plaasgemeenskap,” sê Marius.
Prof. Carlu van der Westhuizen was die voorsitter van die nasionale beoordelaarspaneel wat gehelp het om die wenner aan te wys.
“Die jong boer van die jaar-wedstryd se doel is om erkenning te gee aan die noodsaaklike rol wat jong boere vervul en om hulle te inspireer om innoverende plaaspraktyke wat volhoubaar en produktief is, te ondersoek.
Ons provinsiale finaliste was almal verdienstelike wenners.
Hulle is uitstekende jong boere,” sê hy.
Tony is verantwoordelik vir die beplanning, implementering en beheerfunksies van Manjoh, ’n boerdery wat bestaan uit ’n voerkraal, ’n beesstoet, mielie- en aartappelproduksie.
Hy bestuur ook die landerye se wisselboustelsel en die voerkraal met ’n kapasiteit van 22 000 vee op ’n ekonomies volhoubare manier.
Die fokus val op die koop van volhoubare diere, ’n goeie dieet en siektebeheer en die doeltreffende bemarking van die eindprodukte.
Volgens die beoordelaars bestuur hy sy Beefmaster-stoet op ’n bogemiddelde wyse, terwyl sy wisselboustelsel wat bestaan uit mielies, droë bone, sojabone, suikerbone en bewerkte weiveld “met perfeksie beplan en uitgevoer” word.
Hy blink uit op die gebied van landbouproduksie, bemarking, finansiële en personeelbestuur en sy besluitnemingsproses sluit alle relevante biologiese, ekonomiese en sosiaal ekonomiese faktore in, sowel as die deurlopende aspek van veranderende klimaatstoestande.