Tshwane: Inwoners veg vir erfenisskat

’n Handvol inwoners van ’n spoggerige Pretoriase woonstelgebou van weleer is vasberade om te keer dat dié erfenisskat van sy karakter gestroop word.

Die beheeragent MidCity het die huurders van Clarendonhof, ’n woonstelgebou wat in 1929 digby die Uniegebou in Eastwoodstraat gebou is, verlede maand in kennis gestel dat die woonstelle eersdaags herstel en opgegradeer gaan word.

Die inwoners moet teen nie later nie as 31 Maart uit hul woonstelle wees.

Die huurders vat die kennisgewing met ’n knippie sout en voer aan MidCity wil hulle bloot uitskop sodat dit aan ander “slagoffers” verhuur kan word.

Mnr. Mark Kannemeyer, ’n Pretoriase kunstenaar en seun van wyle prof. J.C. Kannemeyer, sê hulle sukkel al lank om MidCity sover te kry om die vervalle woonstelle te onderhou en te beveilig.

Kannemeyer, ’n inwoner van Clarendonhof, wil weet waarom die huurders se huurooreenkomste beëindig moet word.

“Ons het verlief geraak op die plek, maar voel afgerem oor die situasie.

“Die woonstelle val uitmekaar en verloor hul karakter stelselmatig. Ons is nie oortuig dat MidCity van plan is om dit te herstel nie. Hulle wil dit waarskynlik aan ander slagoffers verhuur.”

Mnr. Avril Paterson, nóg ’n inwoner, sê geen instandhoudingswerk is die afgelope ses jaar by Clarendonhof gedoen nie.

Kannemeyer-hulle verwelkom die plan om Clarendonhof te herstel, maar meen dit is nie nodig dat hul huurooreenkomste beëindig word nie.

“Ons gaan alles moontlik doen om die woonstelle te beskerm,” sê Kannemeyer.

Mnr. Anton Jansen, hoofbeampte van die Tshwane Geboue-erfenisvereniging, sê wetgewing beskerm die woonstelle omdat dit ouer as 60 jaar is.

Voordat die beplande herstelprojek kan begin, sal goedkeuring volgens hom eers van die Gautengse provinsiale erfenisraad (PHRAG) verkry moet word.

MidCity sê hy is nie verantwoordelik vir die “beweerde” agteruitgang van die woonstelle nie.

Mnr. Des Reed, ’n direkteur van MidCity, sê die omvang van die opgradering sal bepaal word nadat die woonstelle ontruim is.

“Geen veranderings aan die struktuur word voorsien nie en geen toestemming (by PHRAG) is dus nodig nie,” sê Reed.

Jansen sê die eienaars móét PHRAG in kennis stel wat die opknappingswerk behels.

“Jy moet baie versigtig wees. Selfs die verkeerde kleur verf kan afbreuk doen aan die woonstelle se karakter.”
 

Mnr. Mark Kannemeyer, ’n inwoner van Clarendonhof, voor dié gebou, wat in 1929 in Eastwoodstraat gebou is. Die inwoners is vies omdat hulle moet uittrek sodat herstelwerk gedoen kan word. Foto: Alet Pretorius