Tshwane: Sin vir humor en positiewe natuur stapklub-‘vereistes’
2012-02-01 06:00
Terwyl die meeste Pretorianers nog knus in hul bed lê of hul eerste koppie koffie van die dag drink, trek ’n groepie bejaardes al hul stapskoene aan.
Die inwoners van die Huis Oase-aftreeoord in Centurion het ’n stapklub begin om fiks en aktief te kan bly. Elke oggend om 06:00 stap hulle sowat 4 km.
Volgens mnr. Dawie Weyers (63), klubkaptein, is daar 23 lede. “Die gemiddelde lid is tussen 60 en 65 jaar oud, maar ons oudste stapper is al in die 80,” sê hy.
Weyers vertel dat lede maandeliks ’n man en vrou kies wat as “stapper van die maand” aangewys word. “Dit is die mense wat positief en gemotiveerd is en lekker grappe vertel,” sê Weyers.
“Ons het ook sommer vir die grap vir elke lid ’n sertifikaat gegee en almal kry ’n sterretjie daarop vir elke dag wat hulle stap.”
Mnr. Fanie Vosloo (62) is verlede maand as die stapper van die maand aangewys en sê hy is in elk geval vroeg op, so die stap doen hom goed. “Dit is lekker om besig te bly en die vars lug is heerlik. ’n Mens maak ook lekker geselsies en ontmoet nuwe mense. Ek en my vrou stap elke oggend saam.”
Volgens Weyers dien dit ook as motivering. “Dit is iets om na uit te sien en ’n heerlike wyse om jou dag te begin.”