Tshwane: Twee provinsiale kampioenskappe by Rietondale

Hardlopers en stappers kan hulle Saterdag gereed maak vir twee provinsiale kampioenskappe tydens McCarthy Toyota se byeenkoms by die Rietondale-park in Pretoria.

Saterdag se halfmarathon kwalifiseer as Atletiek-Gauteng-Noord (AGN) se 21 km-stapkampioenskap en die 10 km-wedloop is insgelyks deel van die provinsiale padwedloop-kampioenskap.

Die wedlope begin om 06:00 by die Rietondale-park en atlete kan by die wegspringplek vir die 10 km- en 5 km-pretdraf inskryf, maar nie vir die 21 km nie omdat slegs vooraf skrywings vir dié wedloop aanvaar word. Tydelike nommers is wel die oggend van die byeenkoms by die wegspringplek beskikbaar.

Die inskrywingsgeld beloop R50 vir die halfmarathon, R35 vir die 10 km-wedloop en R35 vir die pretdraf.

Vir meer inligting bel Hank Bezuidenhout by 012 993 1356.

Die uitslae van die kampioenskappe sal op www.raceresults. co.za en www.magnoliaroadrunners.co.za gepubliseer word.
 
- Hardlopers wat lus is vir iets heeltemal anders kan nou al inskryf vir die Mafikeng-marathon wat op 18 Februarie plaasvind. Benewens die marathon, is daar ook ’n 10 km-wedloop en ’n pretdraf. Vir meer inligting bel James King by
082 445 8795 of stuur e-pos na ehk@ehknw.co.za.

- Die datum vir Suid-Afrika se grootste wedloop, die Spar-vrouewedloop, is aangekondig. Dit is Saterdag 25 Augustus. Omdat die wedloop reeds ’n inskrywingstal van 30 000 vroue bereik het, gaan slegs vooraf inskrywings vanjaar deur die organiseerders aanvaar word.

• Stuur hardloopnuus aan h.va@mweb.co.za.