Tshwane: UP-Tuks is reg, lus vir UJ
2012-02-01 06:00
Daar is ’n beduidende verskil tussen respek en vrees.
Die afrigters van sowel UP-Tuks as TUT, die Blou Bulle se verteenwoordigers in die Varsitybeker-reeks, sal dié rugbywaarheid aan hul onderskeie spanne voorhou in die aanloop tot die eerste wedstryde in die 2012-reeks.
UP-Tuks speel Maandag tuis teen UJ, terwyl TUT in Stellenbosch teen die Maties te staan kom.
Deon Boardman, TUT se afrigter, meen “dit is altyd ’n reusagtige eer en voorreg om teen Maties op Coetzenburg te speel waar jy as besoeker deur dekades se tradisie en kultuur oorweldig kan word”.
“Ons het baie respek vir die Maties en dit wat hulle verteenwoordig, maar ons is nie bang vir hulle nie. Ons glo in onsself en die doel wat ons in 2012 nastreef. Ons gaan nie Stellenbosch toe bloot om ons eerste afspraak agter die rug te kry nie; ons gaan soontoe om na die beste van ons vermoë te kompeteer. Ons is nie meer die Kersvader van Varsitybeker-rugby nie.”
Boardman is egter bekommerd dat sy span weens ’n gebrek aan oefenwedstryde dalk nie skerp genoeg sal wees nie. TUT sou die afgelope Saterdag teen Benoni in ’n opwarmingswedstryd speel, maar die Oos-Randers het Vrydagmiddag laat weet dat hulle eerste span koue voete gekry het.
UP-Tuks se afrigter, Nollis Marais, sê dit pas hom en sy spelers dat UJ die oorwegende gunsteling is.
“Ek verkies dit dat ons die naasgunstelinge is, maar dié status beteken nie dat ons vir UJ sal terugstaan nie. Alles dui daarop dat die stadion stampvol sal wees (14 000 toeskouers), wat ’n gelaaide atmosfeer sal verseker. Uiteindelik sal dit gaan om watter span die druk die beste gaan verwerk. En hier dra UJ soveel swaarder omdat hy by die meeste kenners die gunsteling is om die pyp in 2012 te rook,” meen Marais.
Marais en sy eweknie by UJ, Hugo van As, het albei verlede week die kans gehad om te bepaal hoe groot die taak is wat Maandag wag. Marais was in Johannesburg toe UJ in ’n opwarmingswedstryd teen die Pukke gespeel het en Van As die afgelope Saterdag onder die toeskouers by die wedstryd tussen UP-Tuks en Naka-Bulle.
Toe hy gevra is om kommentaar oor die wedstryd tussen UJ en Pukke te lewer, het Marais geantwoord albei spanne hou daarvan om die bal lug te gee en dat jy nie teen een van hulle sal kan bekostig om besit prys te gee nie.
UP-Tuks se grootste uitdaging teen UJ sal egter wees om te sien tot watter mate die tuisspan se agttal sy man kan staan.
“UJ het ’n gedugte agttal en juis daarom was die wedstryd teen Naka, met sy sterk, aggressiewe en groot voorspelers, net die regte medisyne.
“Ek was baie beïndruk met hoe ons hulle dryf- en maalbewegings keer op keer voor die doellyn gestuit het,” het Marais opgemerk.
Marais en Boardman sal hulle 23-talle môre bekend maak.