Wes Beeld: Sunshine groter en sterker
2012-02-09 23:26
Een van die Wes-Rand se jongste inwonertjies, die kameelperdkalfie Sunshine, wat môre twee weke oud is, is ’n fris meisiekind wat lyk of sy baie tevrede met die wêreld is.
Me. Gaby Burgmer, eienares van die Heia Safari-wildreservaat in Muldersdrift, sê Sunshine se lang kameelperdbeentjies word by die dag net sterker.
Sunshine is die jongste kalf van die kameelperdkoei Lady en die kameelperdbul Big Boy.
Dié jongste aankomeling van die familie in die reservaat het ook ’n broer, Sonnyboy, en ’n sussie, Princess.
Sunshine is 13 dae gelede kort ná dagbreek in die veld naby die Erfenismeer gebore.
Sy is Sunshine genoem omdat mnr. Paul Schulte, die landgoedbestuurder, op haar afgekom het net mooi toe die eerste sonstrale oor die Swartkop-bergreeks in die Wieg van die Mensdom geskyn het.
Sunshine se ma was 15 maande lank dragtig en Sunshine was by geboorte 2 m lank en het 80 kg geweeg.
Vandag is Sunshine sterker en word haar groei beskermend deur haar kameelperdfamilie dopgehou.
“Sy is meer ontspanne en nie meer so gespanne as sy mense of motors hoor nie. Sy pas maklik in die omgewing aan, al beweeg haar ma by tye vir ’n wyle van haar af weg,” sê Burgmer.
“Dit is natuurlike instink wat haar so vinnig op haar voete dwing.
“Sy moet vol selfvertroue wees om aanvalle af te weer. Jy word gebore, staan op, loop en dan ... moet jy hardloop.”
Sunshine soek steeds ’n veilige skuiling onder haar ma se lyf of tussen haar bene.
Met die warm seisoen word sy baie honger, vertel Burgmer, en Lady moet Sunshine dus ’n hele paar keer per dag voed.
“Lady is baie beskermend teenoor Sunshine ... soos net ’n ma maar eintlik kan wees.”