10111 - Skande
2010-02-03 00:41
’n Polisiereservis wat drie keer tydens ’n huisrooftog in Murrayfield, Pretoria, raak geskiet is, kon ná vier oproepe na 10111 steeds nie reaksie van die polisie kry nie.
Die aanval op sers. Johnny de Jager (52), ’n reservis van die Villieria-polisiekantoor, was Vrydag, dieselfde dag dat sowat 50 000 polisielede nasionale polisiedag in Bloemfontein gevier het.
De Jager het gister vertel hy en me. Karen Victor, sy vriendin, het hul storie Vrydagaand omtrent agt keer vergeefs aan die 10111-inbelsentrum se operateurs vertel.
“Hulle het een keer gevra of Murrayfield in Johannesburg is.
“ ’n Ander keer het hulle gesê hulle verstaan nie die (prioriteits)kode (wat die prioriteit van ’n klagte beskryf) wat ek vir hulle gegee het nie. Daarby kon hulle nie Engels verstaan of ordentlik praat nie.”
Die paartjie het in De Jager se woonstel in ’n afgebakende veiligheidsgebied gesit en koffie drink toe hulle meteens in twee vuurwapens se lope vasgekyk het.
“Die een het my laat sit en op die kop geslaan. Ek het afgekyk, want elke keer as ek opkyk, het hy my weer geslaan. Hulle het haar (Victor) ook baie geklap,” het De Jager gesê.
“Hy het heeltyd gesê: ‘I’ll kill you.’
“Hy het toe die rewolwer teen my kop gedruk en die sneller getrek. My ore het getuit. Ek het gesoek vir die tekens van bloed wat vloei en die bene wat lam raak, maar daar was niks. Ek weet nie hoe dit gebeur het nie, maar hy het my skrams op die agterkant van my kop getref.”
Die twee rowers het die paartjie in die badkamer ingedwing. Intussen het De Jager sy vasgebinde hande losgewikkel.
Een het ’n duvet oor Victor se kop gegooi. Toe die ander man inkom, het De Jager hom gegryp en teen die muur gegooi. De Jager het die rower se vuurwapen, wat in die wasbak geval het, gegryp en ’n skoot afgevuur.
Een rower het uitgehardloop terwyl die ander op De Jager geskiet en sy pinkie getref het. Hulle het begin stry waarna De Jager nog ’n skoot afgevuur het. Die rower het teruggeskiet en De Jager in die arm getref.
Albei rowers het weggehardloop. Dis toe sy probleme met 10111 begin het. “Ek het kalm gebly en net die relevante inligting gegee wat die polisievoertuig in staat sou stel om by die toneel uit te kom,” het De Jager gesê. “Die operateur het gesê hy weet nie waar Murrayfield is nie.
“Sulke situasies sal meer positief uitdraai as die persoon by 10111 die inligting kan verstaan en deurgee. Dit kan ’n verskil van 30 sekondes maak wat daartoe kan lei dat ’n verdagte gevang kan word of nie.”
Ná die vierde probeerslag het Victor met De Jager hospitaal toe gejaag.
’n Polisielid het die volgende oggend by De Jager in die hospitaal aangekom en vir hom gesê hy moet hom bel as hy gesond is.
Dir. Govindsamy Mariemuthoo, kommunikasiehoof van die Gautengse polisie, het gesê die bewerings word in ’n ernstige lig beskou en sal ondersoek word.
- Beeld