1ste ‘Jailbreaker’ ter wêreld in SA gearresteer

Die eerste mens ter wêreld wat weens die “jailbreaking” van PlayStation 3 (PS3)-konsoles in hegtenis geneem is, is eergister in Johannesburg vasgetrek.

Mnr. Jacques Allers, ’n direkteur by die Suid-Afrikaanse federasie teen kopieregdiefstal (Safact), het gister aan Beeld gesê Jailbreak is sagteware wat op konsoles gelaai word en wat die gebruikers toelaat om roofspeletjies daarop te speel.

“Dit herskryf die PS3 se interne veiligheidsprotokols. Geroofde speletjies word dan op die PS3 se hardeskyf gekopieer.”

Allers meen dit is mense wat nie vir duur, oorspronklike speletjies wil betaal nie wat Jail-break op hul konsoles laai.

Die hele proses is in stryd met die Wet op Elektroniese Kommunikasie en Transaksies.

“Dit is onwettig om Jailbreak-sagteware te besit of om dit te verkoop,” aldus Allers.

Volgens mnr. Jacques Botha, direkteur van finansies en spe-siale operasies by Safact, is Jailbreak ’n groot probleem oor die wêreld heen.

Inligting is gekry oor ’n man in Parktown wat Jailbreak-sagteware op konsoles laai en ook geroofde speletjies verkoop.

Safact het dit by die polisie se handelsmisdaadeenheid aangemeld wat eergister op die huis toegeslaan het.

“Hulle het beslag gelê op goedere met ’n waarde van omtrent R100 000,” het Botha gesê.

Die goedere word gebruik om Jailbreak-sagteware op konsoles te laai en om speletjies te vervals. Dit sluit gesofistikeerde rekenaars, omseilingsagtewarebondels, Jailbreak-USB-toestelle en hardeskywe in.

Die man is sover bekend die eerste persoon wat weens die besit en verkoop van Jailbreak-sagteware wat spesifiek op die PS3 gemik is, gearresteer is.

Hy verskyn vandag of môre in die Johannesburgse handelshof.