2 sê ja om gratis te moor

2010-07-29 22:30

Hy en mnr. Glenn Agliotti het besluit hulle sal die mynmagnaat mnr. Brett Kebble verniet help om sy lewe te beëindig, al het hulle vroeër ooreengekom om R2 miljoen daarvoor te vra, het mnr. Clinton Nassif gister getuig.

Hy is die staat se stergetuie as die “vermiste skakel” tussen die Mikey-bende, wat die doodskietwerk gedoen het, en die drie mans wat die moord na bewering beplan het – Kebble self, Agliotti en mnr. John Stratton, sakevennoot van Kebble.

Agliotti staan in die hooggeregshof in Johannesburg tereg op onder meer aanklag van moord op Kebble, sameswering tot moord en poging tot moord op onder andere mnr. Stephen Mildenhall, ’n ouditeur.

Die Mikey-bende is mnre. Mikey Schultz, Nigel McGurk en Faizel (Kappie) Smith. Al drie het reeds getuig.

Volgens Nassif het Agliotti aan hom gesê hulle gaan Kebble nie help as hy hulle nie betaal nie.

Hulle het hom die oggend van die eerste poging (26 September 2005) besoek om planne te bespreek en gesien hy “is ’n desperate man”. “Hy het ons gesmeek om te reël dat hy doodgeskiet word.

“Hy het gesê hy gaan óf in ’n hospitaal vir sielsiekes óf in die tronk beland.

“Ek en Glenn het besluit ons sal hom help, al het ons toe geweet daar sal nie geld wees nie.

“Brett was dankbaar.”

Nassif het ook getuig hoe hy in opdrag van Agliotti Kaapstad toe gegaan het om van Stratton ’n naam en adres te kry van iemand (Mildenhall) wat “vir so twee, drie maande uit die stelsel gehaal moet word”. “Agliotti het my R200 000 daarvoor gegee.”

Adv. Laurance Hodes SC, vir Agliotti, het in kruisverhoor van ’n kant af onder Nassif ingeklim.

Ná ’n anderhalfuur daarvan het regter Frans Kgomo die hof vroeër verdaag omdat hy “kan sien die getuie is moeg”.

Dit was net toe Nassif gesukkel het om te antwoord nadat Hodes gevra het hoekom hy in sy volledige verklaring aan die polisie alles genoem het waarby Agliotti betrokke was, maar niks van die Mildenhall-voorval gesê het nie.

In Hodes se spervuur het Nassif die woorde “ek kan nie onthou nie” byna as ’n refrein gebruik. Net so het Hodes se woorde “en hier het ons nóg ’n leuen” ook ’n refrein geword.

Hodes se eerste vraag aan Nassif was wanneer hy sy heel eerste verklaring oor die Kebble-moord afgelê het. Sy antwoord was in 2006. Hodes het daarop ’n verklaring te voorskyn gebring wat op 10 November 2005 deur Nassif afgelê is en wat ook in die staat se besit is.

Die drie staatsadvokate het dit eers ontken en later ná ’n naarstige soektog erken hulle het dit.

Die verhoor duur voort.

Sy pa het geweet
Kebble se pa, Roger, het van sy seun se selfmoordplanne geweet omdat hy (Nassif) hom vertel het, het Nassif gister getuig. Kebble sr. het in 2008 in ’n hooggeregshofaansoek mnr. Glenn Agliotti en mnr. John Stratton gedagvaar vir sowat R15 miljoen.

Hy het gesê hy wil hê die “persone wat verantwoordelik is vir sy (Brett se) moord” moet betaal sodat daar vir sy vier kinders gesorg kan word.

Die Kaapse hooggeregshof het vandeesweek Kebble sr. toestemming verleen om ’n dagvaarding aan Stratton, ’n sakeman wat hom tans in
Australië bevind, te beteken.

Omdat Stratton tans ’n buitelander is, moes Kebble sr. ook die hof vra om te bevestig dat dit jurisdiksie oor hom het. Dit is toegestaan.

Selebi
Nassif het getuig hy het in opdrag van Agliotti aan die Kebbles gesê hy werk vir mnr. Jackie Selebi, destyds polisiekommissaris.

Hulle het Kebble en sy vennoot, mnr. John Stratton, onder die indruk gebring Nassif werk vir ’n ondergrondse eenheid wat direk onder Selebi geval het.

“Ons het Brett en Stratton ook laat glo ons kan mense in hoë posisies omkoop. Hulle het ons dan die geld gegee en ons het dan gesê ons het dit gedoen, maar eintlik self die geld gehou. Dit word ‘knock-ing’ genoem. Ons het hulle baie keer ge-‘knock’.

“Ek dink hulle het ons nie altyd geglo nie en hulle wou veral graag Selebi ontmoet om te bewys ons betaal hom.”

Nassif het as ’n voorbeeld van hoe hulle die Kebbles ge-knock het, gesê hy en Agliotti het beweer hulle het die staat omgekoop om ’n aanklag van bedrog teen mnr. Roger Kebble terug te trek. Hulle het nooit iemand omgekoop nie en die geld self gehou.

Hiërargie van opdraggewers
Die hiërargie van opdragte was volgens Nassif van bo na onder:

• Mnr. Brett Kebble;
• Mnr. John Stratton – hy is ’n Australiër wat terug is daarheen nadat die Kebble-bom gebars het;
• Mnr. Glenn Agliotti;
• Hyself; en
• Sy manne – Mikey Schultz, Nigel McGurk, Faizel Smith, Stephen Sander en die twee wat Mildenhall geskiet het.

Nassif het in die ooreenkoms wat hy met die staat beding het ook vrywaring vir al hierdie “manne” beding.

Op ’n vraag waarom hy nie ook vir Agliotti vrywaring beding het nie, het hy gesê hy het nie vir Agliotti verantwoordelik gevoel nie omdat hy nie onder hom gewerk het nie.

Diefstal in hof
Die toerusting waarmee ’n private onderneming die hofgebeure vir mnr. John Stratton opneem, is uit Hof C op die vierde vloer van die hooggeregshof in Johannesburg gesteel.

Die moordverhoor van mnr. Glenn Agliotti het gister laat begin omdat vingerafdruk-deskundiges eers die toneel moes ondersoek.

Stratton word by die Kebble-moord betrek. Hy is ’n Australiër wat ná die moord na sy vaderland teruggevlug het. Die opnames word daagliks vir hom getranskribeer en hy kan elke volgende oggend die presiese hofgebeure van die vorige dag lees.

Die toerusting en die mikrofone daarvan vir die regter en die verdedigingsadvokaat is gesteel.

Dit is sowat R20 000 werd.