Met ’n maand van die Borg ’n Woord-projek oor is 2?000 woorde reeds
“gekoop”, het dr. Willem Botha, uitvoerende direkteur van die Woordeboek van die
Afrikaanse Taal (WAT), oor hul geldinsameling gesê.
Enigeen kan ’n Afrikaanse woord teen R100 elk borg. Dié geld stel
die WAT in staat om sy werk voort te sit.
Uit Londen het mnr. Mikael en me. Marina Grut “laatlammetjie” en
“boeretroos” geborg.
Mnr. Evgeny Artemov van Moskou het sy beursie vir die woorde
“sjoe!” en “aikôna!” uitgehaal.
“‘Sjoe!’ en ‘aikôna!’ is my alternatiewe gebruikersname op
verskeie internetforums,” het Artemov gesê. “Hulle klink vreeslik fris en
eksoties hier.”
Me. Erika Janse van Rensburg borg die woordjie “die” omdat sy meen
dit word geringgeag en deur “jou” verdring.
Mnr. Izak Spangenberg het “oorstaanjaar” (“vir die lelike gap-jaar”) gekies, terwyl mnr. Robert Harm onderneem het om elke
maand van 2012 ’n seiljagterm te borg. Hy het met “fokseil” begin.
Die Albatros-gholfklub in die Oos-Kaap het elke speler wat ’n
Engelse term op die baan gebruik het ’n boete van R1 laat betaal. Só is R300 in
’n japtrap ingesamel om “albatros” (drie houe minder as syfer), “spogtwee” (twee
houe vir enige gat) en “brouhou” (een hou meer as syfer) te borg.
Mnr. Teo Louw wil die langste woord in Afrikaans borg en die WAT
het moontlikhede aan hom voorgelê, soos
“soldatetentoonstellingstoegangskaartjieknipapparaatbedieningsmeganismehersteller”
en “Tweebuffelsmeteenskootmorsdoodgeskietfontein”.
Talle mense en organisasies het R5?000 uitgehaal om ’n woord
eksklusief te borg.
Onder hulle is die skrywer Deon Meyer, wat “spanning” gekies het,
die geskiedkundige prof. Herman Giliomee met “sukkel” en die sakeman mnr. Steve
Booysen, wat op “waardes” besluit het.
Nog eksklusief geborgde woorde is “bemagtiging” (die Stigting vir
die Bemagtiging deur Afrikaans), “burgerregte” (AfriForum), “dagbreek” (Dagbreek
Trust), “integriteit” (me. Mariette Rossouw), “Jesus” en “radio”
(RadioTygerberg), “sonsaksopie” (mnr. Paul Kruger), “tameletjie” (me. Adelia
Carstens) en “Voortrekkers” (die Voortrekkers).
Afri-Infra Raadgewende Ingenieurs het met R10?000 dubbel seker
gemaak “Tafelberg” is slegs hulle s’n.
Deelnemers het nog tot 29 Februarie kans om ’n woord te borg en
daarmee in aanmerking te kom vir ’n Absa-belegging van R25 000. Besonderhede by
www.wat.co.za.