5 boewe doodgeskiet vir hul buit – ’n bed
2010-02-07 23:33
- Artikelopsies
- Deel
- Kry Beeld op
Durban. – Vyf gewapende inbrekers het die naweek hier met hul lewe geboet – oënskynlik net vir ’n bed.
Lede van die polisie se taakspan in Inanda is ontbied nadat die vyftal Vrydag omstreeks 22:30 in ’n arm deel van die Ohlange-gebied hier skote buite ’n huis afgevuur het voordat hulle ingebreek en ’n bed gesteel het.
Die aanvallers het skote met ’n haelgeweer en Uzi-masjienpistool afgevuur om waarskynlik die huisbewoners te verwilder, maar niemand was tuis nie, het sr.supt. Jay Naicker, polisiewoordvoerder, gesê.
Volgens die huiseienaar het die inbrekers net die bed gevat, dit agter op ’n Ford Bantam-bakkie gelaai en daarmee weggery.
Net meer as ’n halfuur later het vyf speurders van die taakspan die bakkie naby die Dube-winkelsentrum in die omgewing gewaar en dit voorgekeer.
Die speurders en inbrekers het almal tegelyk uit hul voertuie gespring, het Naicker gesê. Die misdadigers het op die polisiebeamptes geskiet en is almal in die daaropvolgende skietgeveg dood.
Die verdagtes was almal van iets in die dertig.
Volgens Naicker is die rede vir die misdadigers se optrede nie in hierdie stadium duidelik nie, maar rekords word nagegaan om te sien of hulle met enige ander misdade verbind kan word.
Die naburige township KwaMashu het die afgelope jaar die hoogste moordsyfer in die land gehad.
Die polisie het dossiere vir ’n nadoodse ondersoek, huisbraak en diefstal en poging tot moord aangelê.
- Beeld