64 000 jaar oue pylpunte in SA grot ontdek

’n Span wetenskaplikes het 64 000 jaar oue klippylpunte wat glo die oudste direkte bewyse van mensgemaakte gereedskap is in ’n grot in die noorde van KwaZulu-Natal ontdek.

Die ontdekking plaas die ontwikkeling van pyl-en-boog-tegnologie onder mense sowat 20 000 jaar vroeër as wat aanvanklik gedink is, lui ’n verklaring op die Universiteit van Johannesburg (UJ) se webwerf (www.uj. ac.za).

Dr. Marlize Lombard, ’n navorser van die UJ, het gesê die klippylpunte is in ou sediment-lae in die Sibudu-grot in ’n sandsteenkrans in die noorde van KwaZulu-Natal opgegrawe.

“Die pylpunte is noukeurig ondersoek en daar is tekens van bloed en been gevind, wat ons ’n aanduiding gee van hoe die pylpunte deur ons voorvaders gebruik is,” het sy gesê.

Die vorm van die geometriese pylpunte dui aan hoe dit gekap, gevorm, tydens gebruik beska-dig en aan pylskagte vasgebind is.

Tekens van ’n soort gom, wat van plantsappe gemaak kan word, is ook gevind.

Die gom is volgens Lombard waarskynlik gebruik om die pylpunte aan hout- of rietskagte te heg.

Die span, onder leiding van prof. Lyn Wadley van die Universiteit van die Witwatersrand, se bevindings is onlangs in die joernaal Antiquity gepubliseer.

Lombard het gesê die teenwoordigheid van gom dui daarop dat die oermense wat die pylpunte gemaak het, daartoe in staat was om betreklik ingewikkelde, saamgestelde gereedskap te vervaardig.

“Hulle kon dus verskillende elemente van verskillende stowwe aanmekaar heg om ’n enkele, funksionele stuk gereedskap te maak.”

Die proses behels volgens prof. Larry Barham van die Universiteit van Liverpool “veeleisende kognitiewe gedrag” – wat wetenskaplikes nie gedink het so ver terug by oermense al moontlik was nie, berig Sapa.

Lombard het gesê die ontdekking is ’n stap in die regte rigting om uit te vind hoe die mensdom begin dink het soos ons vandag dink.