AfriForum tree toe tot Huntley-saak

Kaapstad. – Die uitgeweke mnr. Brandon Huntley se Kanadese vlugtelingstatus gaan internasionaal deur AfriForum ondersteun word.

Luidens ’n verklaring deur dié burgerregte-inisiatief is hy besig om met Kanadese en internasionale menseregtekenners te konsulteer oor die moontlikheid om as amicus curiae (vriend van die hof) toe te tree in die Kanadese regering se beoogde hersieningsaansoek van Huntley se verkrygde vlugtelingstatus.

Die Kanadese regering het pas sy voorneme bekend gemaak om die beslissing van die tribunaal op hersiening te neem.

Volgens mnr. Willie Spies, Afri-Forum se regsverteenwoordiger, is daar nou deur dié organisasie besluit om tot die hofsaak toe te tree.

AfriForum se besluit is geneem nadat dit bekend geword het dat me. Thandi Modise, die ANC se adjunk-sekretaris-generaal, op die Huntley-geval kommentaar gelewer het deur te sê dat haar ondervinding in Suid-Afrika eerder is dat rasse-aanvalle andersom – wit teenoor swart – plaasvind.

Spies het gesê AfriForum wil met sy toetrede tot die saak “verseker dat Modise en die ANC se verdraaide weergawe van die misdaadkrisis in Suid-Afrika teengewerk word”.

Ongeag of Huntley opportunisties was of nie, is dit volgens AfriForum van nasionale belang dat daaglikse konfrontasies waarmee Suid-Afrikaners te doen kry bekendgemaak word.

Volgens Spies sou Huntley nooit met sy betoog voor ’n internasionale tribunaal geslaag het as dit nie was vir gereelde berigte uit Suid-Afrika wat dui op ’n oordrewe rasse-obsessie by die regering nie.

“Dit sou bitter jammer wees as ’n hersieningshof in Kanada slegs uitgelewer is aan inligting soos dit deur die Suid-Afrikaanse regering aan die Kanadese regering gestel word,” het Spies gesê.

- Beeld