Anika se eks-kêrel eis nou
2012-02-21 22:53
- Artikelopsies
- Deel
- Kry Beeld op
Anika Smit (17) se gewese kêrel eis R285 000 van die polisie weens onregmatige inhegtenisneming.
Mnr. Nico Venter (22) is sowat twee maande ná dié blondekop se dood in Maart 2010 weens haar moord gearresteer.
Die aanklagte teen hom is ’n paar maande later teruggetrek.
Intussen is Anika se moordenaar steeds op vrye voet byna twee jaar nadat sy in haar ouerhuis in Theresapark, noord van Pretoria, vermoor is.
Ná die moord het haar moordenaar haar hande afgekap en dit saam met hom geneem.
Lt.kol. Lungelo Dlamini, Gautengse polisiewoordvoerder, het gesê hoewel verskeie mense al ondervra is, is ’n verdagte nog nie geïdentifiseer nie.
Na verneem word, is dit weens ’n gebrek aan bewyse.
Volgens Dlamini gaan die ondersoek onverpoos voort.
Venter eis in die hooggeregshof in Pretoria R85 000 weens sy onregmatige arrestasie en aanhouding, asook eerkrenking, van die minister van veiligheid en sekuriteit (nou minister van polisie) en ao. Werner van den Bergh, ’n speurder van die Pretoria-Noord-polisiekantoor.
Luidens hofstukke het Van den Bergh Venter op 18 Maart 2010 sonder ’n lasbrief by die Carousel-casino, noord van Pretoria, gearresteer. Dít was agt dae ná Anika se moord.
Venter beweer hy is ná sy arrestasie drie en ’n half uur lank by die Pretoria-Noord-polisiekantoor aangehou.
Volgens die verweerders se hofstukke is Venter nie in hegtenis geneem nie, maar het hy vrywillig saam met die polisie gegaan en is hy net ondervra.
Venter eis voorts R200 000 van die minister en ao. Annerie Robinson (volgens die hofstukke Annelie Robertson). Robinson was ’n speurder by die Akasia-polisiekantoor.
Robinson het Venter “weer ’n keer” op 17 Mei 2010 by die Carousel-casino sonder ’n lasbrief gearresteer, lui die hofstukke.
Venter beweer hy is van omstreeks 05:00 dié oggend tot 19 Mei 2010 om 16:55 aangehou.
Volgens die verweerder is Venter nie weer in hegtenis geneem nie, maar was dit die eerste arrestasie en is dit ingevolge die wet gedoen.
Daarby is hy van 07:10 op 17 Mei 2010 tot 07:45 op 19 Mei 2010 aangehou.
Die verweerder sê voorts Venter het nie betyds kennis gegee het dat hy van ’n staatsinstelling wil eis nie.
’n Verhoordatum vir die eis is nog nie bepaal nie.
- Die polisie het enigiemand met inligting rakende Anika se moord gevra om kapt. Mike Van Aardt, ondersoekbeampte, by 082 575 1808 te bel.
Haar moordenaar steeds nie gevang.