Baas dood dalk werker
2012-01-22 21:16
- Artikelopsies
- Deel
- Kry Beeld op
Nelspruit. – ’n 30-jarige man is gisteroggend naby die stad doodgeskiet toe rowers hom as ’n menslike skild gebruik het.
Mnr. Michael Stenger, wat by Sound Systems gewerk het, is vermoedelik per ongeluk tydens die rooftog deur mnr. Charles Loram, sy werkgewer, raak geskiet.
Twee rowers is ook vermoedelik gewond.
Vier rowers het omstreeks 09:30 in ’n rooi BMW by die hoewe op die Barberton-pad vanwaar Sound Systems bedryf word, opgedaag.
Loram het glo deur sy kamervenster gesien hoe een van die vier insittendes ’n klapmus oor sy kop trek.
Hy is met sy .38-rewolwer in sy sak na die kantoor waar Stenger werk.
Toe hy inkom het die rowers met Stenger gestoei. Twee van hulle het Loram bestorm.
Loram het geskiet.
Die rowers het Stenger na ’n aangrensende kantoor gesleep.
Daar het hulle Stenger voor hulle gehou terwyl Loram weer skote afgevuur het.
Hy het daarna na buite gehardloop en glo nog skote deur die kantoor van die venster geskiet.
Sy patrone was toe blykbaar klaar en hy het na sy slaapkamer gehardloop om sy 9 mm-pistool te kry.
In daardie stadium het die rowers na hul motor gehardloop.
Die hoewe se elektriese hek het intussen toegegaan en die rowers kon nie die voertuig uitkry nie.
Hulle het toe weggehardloop.
Loram het glo deur die kamervenster nog op hulle geskiet. Hy het blykbaar twee raak geskiet.
Toe hy na die kantoor terugkeer het hy ’n swaar gewonde Stenger op die vloer gekry.
Stenger is blykbaar deur die hart geskiet.
Paramedici is ontbied, maar by hul aankoms was Stenger reeds dood.
Die polisie het op Loram se rewolwer en minstens agt 9 mm-patroondoppies beslag gelê.
’n Gewonde verdagte is later in hegtenis geneem toe hy by die Nelspruit-polisiekantoor opgedaag en gekla het dat sy rooi BMW gekaap is.
Nadat die polisie veiligheidskameras by Sound Systems nagegaan het, is vasgestel dat die man wat oor die BMW gekla het inderdaad een van die vermeende rowers is.
Hy het ’n skietwond in die regterboud.
’n Vrou is ook kort ná die voorval by ’n taxistaanplek in hegtenis geneem, maar later vrygelaat.
Die polisie het vasgestel een van die verdagtes het die rooi BMW vroeër die oggend by ’n vrou in Witrivier geleen.
Hy het aangevoer hy wou daarmee na ’n begrafnis gaan, het lt.kol. Leonard Hlathi, polisiewoordvoerder, gesê.
Loram, wat onder meer ’n lewensafrigter en dieetkundige is, was teen druktyd steeds te geskok om ’n verklaring aan die polisie te gee.
Stenger het op 30 Desember sy 30ste verjaardag gevier.
Hy was verloof aan me. René Roestorf en die twee sou in September getrou het.
Hy laat sy ma, mev. Hannie Klokie, en susters, mee. Monika Stenger en Manuela Bergendahl, agter.
Hlathi het gesê die polisie ondersoek klagte van moord en poging tot roof.