Baba gebore wyl pa in waakeenheid lê
2012-02-24 22:05
Terwyl ’n 21-jarige Krugersdorpse man hospitaal toe gehaas is nadat sy drankie vermoedelik gedokter is, was sy voormalige meisie besig om aan hul seuntjie geboorte te gee.
Klein Declan is Sondagoggend gebore terwyl sy pa, mnr. Travis van Niekerk, in die waakeenheid van die Arwyp- mediese sentrum in Kempton Park gelê het.
Van Niekerk het Saterdagaand saam met mnr. Jaco van Wyk, ’n vriend, ’n drankie by Presley’s in Boksburg gaan drink. Hy was blykbaar senuagtig oor sy seun se geboorte.
Sy ma, me. René van Niekerk, het hom kort voor middernag gebel om te sê hy moet huis toe kom omdat sy eks, me. Cha-Mari Canha (22), begin kraam het.
“Hy het my later gebel en gesê: ‘Mamma, ek voel verskriklik, maar ek het nie eens baie gedrink nie.’”
Van Wyk was ook baie naar, maar het nie nodig gehad om hospitaal toe te gaan nie.
“Travis het vanoggend, toe hy bygekom het, gesê hy dink Jaco het net twee slukkies van die laaste drankie gehad en hy die res.”
Me. Van Niekerk het Canha kort ná middernag hospitaal toe geneem. Sowat ’n uur en ’n half later het sy ’n oproep ontvang dat haar seun ophou asemhaal het.
Me. Van Niekerk en haar man, Corrie, het Kempton Park toe gejaag.
Van Niekerk jr. is op ’n ventilator in die waakeenheid geplaas. Dokters het barbiturate (’n verdowingsmiddel) in sy bloed gekry, maar geen ander dwelmmiddels nie. Hy het dae lank erge konvulsies gekry.
Sy dokters het eergister aan sy ouers gesê hulle wil sy verdowing oor twee dae lig en dan die ventilator ontkoppel.
Tydens sy fisioterapiesessie gisteroggend het hy die pyp egter self uitgetrek.
Die Van Niekerks het mense gewaarsku om versigtig te wees.
Van Niekerk en Van Wyk het hul drankie blykbaar op ’n tafel gelos en gesien dis geskuif toe hulle terugkom, maar niks snaaks daarvan gedink nie.
“Ons het Travis oor en oor gewaarsku, hou ’n oog op jou drankie,” het me. Van Niekerk gesê.
“Dis nie meer net meisies met wie dit gebeur nie.”
Mnr. Chris da Silva, eienaar van Presley’s, het gesê hulle duld geen dwelms in die klub nie.