Bees by kaal-klub

2010-09-02 00:05

Die Blou Bul-stut Bees Roux het ná ’n dronk kuieraand in onder meer ’n berugte ontkleeklub in Pretoria vermoedelik in die hande van ’n afperser in die
metropolisie beland.

Roux het tot in die vroeë oggendure in die klub Flamingo in Kerkstraat gekuier voordat hy deur Tshwane-metropolisielede van die pad afgetrek is.

Ná ’n voorval waarin een van dié lede dood is, is Roux in hegtenis geneem weens moord.

Mnr. Pieter Crous, eienaar van Flamingo, het gister gesê lede van die Tshwane-metro-polisie wag sy kliënte in die oggendure in waarna hulle opgelaai word en na kitsbanke geneem word.

“Die kliënte moet dan geld trek en aan die metropolisielede gee of hulle word weens dronkbestuur gearresteer.”

Volgens Crous het ’n ontklee-danseres aan hom bevestig Roux en ’n vriend was Vrydagoggend in sy klub.

Nog iemand wat in Flamingo was, het gesê Roux en sy vriend het kort voor middernag “reeds dronk” daar aangekom. Roux het volgens dié persoon gesêhy is ’n Blou Bul.

Roux het die klub ná 01:00 verlaat. “Vermoedelik het hy toe die prooi van korrupte metropolisielede geword,” het Crous gesê.

Roux het Maandag in die Pretoriase landdroshof verskyn op aanklagte van moord op sers. Ntshimane Johannes Mohale (38) en dronkbestuur.

Hy is vrygelaat op borgtog van R100 000.

Mnr. Rudi Krause, sy regsverteenwoordiger, het in die borgtogaansoek gesê Roux was ’n “slagoffer van diefstal deur ’n metropolisiebeampte”.

Die Tshwane-metropolisie het ’n interne ondersoek begin na Mohale en sy twee kollegas wat Roux dié oggend afgetrek het.

Dié ondersoek sal die vierde interne klag wees wat teen Mohale ondersoek word.

Drie interne ondersoeke waarby Mohale betrokke was, is reeds ingestel, het Beeld by vier onafhanklike betroubare bronne verneem.

Die ondersoeke behels klagte van:

• Diefstal en wanordelike optrede in Julie 2007;
• Pligsversuim en onprofes­sionele gedrag in November 2008; en
• Growwe nalatigheid, die pleging van ’n daad wat skadelik vir die munisipaliteit is en pligsversuim in Desember 2008.

Nie een van dié ondersoeke of tugverhore is afgehandel nie.

Mnr. Console Tleane, woordvoerder van Tshwane se departement van gemeenskapsveiligheid, wou nie een van die klagte bevestig nie. Hy het wel gesê die metropolisie se interne ondersoek na Mohale se moord? is “standaardprosedure”.

“Ons werk saam met die polisie om die saak te verstaan.”

Hulle kyk onder meer na die proses wat gevolg is nadat Roux weens dronkbestuur van die pad afgetrek is. Roux is nie gearresteer of geboei nie.

Mohale het agter die stuurwiel van Roux se motor ingeklim en met hom rondgery.

Waar hulle oral gery het, kon teen druktyd nie bevestig word nie. Hulle het wel weg van die naaste polisiekantore, Sunny­side en Brooklyn, gery.

Me. Dikeledi Lehobye, burgemeesterskomiteelid vir gemeenskapsveiligheid in Tshwane, het die middag ná Mohale se dood gesê die metropolisielede was op pad om Roux na sy huis toe te neem toe die voorval plaasgevind het.

Roux bly in Equestria, in die ooste van Pretoria.

Krause wou nie kommentaar lewer nie en wou nie hê dat Beeld met Roux praat nie.

As dit dronkbestuur is
Die Strafproseswet bepaal ’n wetstoepasser moet wanneer hy ’n persoon weens dronkbestuur aftrek die persoon in toom hou deur hom te boei, aan hom verduidelik waarom hy in hegtenis geneem word, sy regte aan hom voorhou en hom na die naaste polisiekantoor neem.